ଦିଗପହଣ୍ଡି,୧୫ା୪(ଡି.ଏନ.ଏ.)- ସମଗ୍ର ବିଶ୍ୱ ଏବେ ରୋନା ମହାମାରୀ ସହ ଲଢୁଛି। ଏଭଳି ପରିସ୍ଥିତିରେ ଡାକ୍ତର, ପୋଲିସ ଓ ପ୍ରଶାସନିକ ଅଧିକାରୀଙ୍କ କର୍ତ୍ତବ୍ୟ ବଢିଯାଇଛି। ଏମାନେ ଏବେ ଏହି ଲଢେଇର ପ୍ରମୁଖ ଯୋଦ୍ଧା ପାଲଟିଛନ୍ତି। ଏଭଳି ଜଣେ ଯୋଦ୍ଧା ହେଉଛନ୍ତି ଦିଗପହଣ୍ଡି ଏକ୍ଜିକ୍ୟୁଟିଭ ମାଜିଷ୍ଟ୍ରେଟ ତଥା ତହସିଲଦାର ଅଦ୍ୱୈତ କୁମାର ସ୍ବାଇଁ। କର୍କଟ (କ୍ୟାନ୍ସର) ରୋଗରେ ପୀଡିତ ଥାଇ ମଧ୍ୟ ସେ ତାଙ୍କ କର୍ତ୍ତବ୍ୟ କରିଚାଲିଛନ୍ତି। ୫୯ ବର୍ଷ ବୟସରେ ଅସୁସ୍ଥତା ସତ୍ତ୍ବେ ଗଁା ଗଁା ବୁଲି ସଚେତନତା ସହ ପ୍ରଶାସନିକ ଦାୟିତ୍ୱ ତୁଲାଇ ସେ ଏବେ କରୋନାର ପ୍ରକୃତ ଯୋଦ୍ଧା ଭାବେ ଠିଆ ହୋଇଛନ୍ତି।
ଏନେଇ ତାଙ୍କୁ ପଚାରିବାରୁ ତହସିଲଦାର ସ୍ବାଇଁ କହିଥିଲେ, ଅସୁସ୍ଥତା ଠାରୁ ନିଜର କର୍ତ୍ତବ୍ୟ ବଡ, କର୍କଟ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ ମଧ୍ୟ ନିଜକୁ ଜଣେ ରୋଗୀ ବୋଲି ମୁଁ କେବେ ଭାବି ନାହିଁ। ତେଣୁ ପ୍ରତିଦିନ ସକାଳୁ ବିଳମ୍ବିତ ରାତି ଯାଏ ଜିଲା ପ୍ରଶାସନର ନିର୍ଦ୍ଦେଶକ୍ରମେ ସମସ୍ତ କାର୍ଯ୍ୟ ସୁଚାରୁରୂପେ ତୁଲାଇ ଆସୁଛି।
୨୦୧୧ରୁ କର୍କଟ ରୋଗରେ ଆକ୍ରାନ୍ତ ଥିବା ତହସିଲଦାର ସ୍ବାଇଁ ହାଇଦ୍ରାବାଦର ଏକ ଘରୋଇ ହସ୍ପିଟାଲରେ ନିୟମିତ ବ୍ୟବଧାନରେ କେମୋ ନେଉଛନ୍ତି। ଏପ୍ରିଲ ପ୍ରଥମ ସପ୍ତାହରେ କେମୋ ପାଇଁ ଯିବାକୁ ପୂର୍ବରୁ ସ୍ଥିର ହୋଇଥିଲେ ମଧ୍ୟ ଲକ୍ଡାଉନ ଯୋଗୁ ସେ ଯାଇପାରି ନ ଥିବା କହିଛନ୍ତି। ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ତାଙ୍କ ଅସୁସ୍ଥତା ସମ୍ପର୍କରେ ଜାଣି ଅଧିକ ସମୟ ବିଶ୍ରାମ ନେବାକୁ ପରାମର୍ଶ ଦେଇଥିଲେ ମଧ୍ୟ ସେ କେବେ ମଧ୍ୟ ଅସୁସ୍ଥତା ଦର୍ଶାଇ କାର୍ଯ୍ୟ ଦିବସରେ ଛୁଟି ନେଇ ନ ଥିବା କହିଛନ୍ତି। କରୋନା କବଳରୁ ଦିଗପହଣ୍ଡିବାସୀ କିଭଳି ରକ୍ଷା ପାଇବେ ତାହା ତାଙ୍କର ପ୍ରଧାନ ଲକ୍ଷ୍ୟ ବୋଲି ସେ କହିଛନ୍ତି।
