ରସୁଲପୁର, ୨୪।୫ (ଡି.ଏନ୍.ଏ.)-କରୋନା ପାଇଁ ଦେଶବ୍ୟାପୀ ଲକ୍ଡାଉନ୍ ଚାଲିଥିବା ବେଳେ ରସୁଲପୁର ବ୍ଲକ କୃଷି କାର୍ଯ୍ୟାଳୟ ସମ୍ମୁଖରେ ଚାଷୀଙ୍କ ଅସମ୍ଭବ ଭିଡ଼ ଦେଖିବାକୁ ମିଳିଥିଲା। ଘାସମରା ଔଷଧ ନେବାକୁ ଆସିଥିବା ଚାଷୀମାନେ ସାମାଜିକ ଦୂରତା ରକ୍ଷା ନ କରି କୃଷି କାର୍ଯ୍ୟାଳୟ ଫାଟକ ଆଗରେ ଭିଡ଼ ଜମାଇଥିଲେ। ଏ ନେଇ କୃଷି ଅଧିକାରୀ ଭାଗ୍ୟଧର ସାହୁ ପୋଲିସକୁ ଜଣାଇବା ପରେ ପୋଲିସ ଉପସ୍ଥିତିରେ କାର୍ଯ୍ୟାଳୟ ଫାଟକ ଖୋଲା ଯାଇଥିଲା। ମାତ୍ର ଚାଷୀମାନେ କରୋନା କଟକଣା ନ ମାନିବାରୁ ଚାଷୀ ଓ ପୋଲିସ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା। ସ୍ଥିତି ନିୟନ୍ତ୍ରଣ ବାହାରକୁ ଚାଲିଯିବାରୁ ପୋଲିସ ଘଟଣାସ୍ଥଳ ଛାଡ଼ି ଚାଲି ଯାଇଥିଲା। ଏହାଛଡ଼ା ସାମାଜିକ ଦୂରତା ରକ୍ଷା ନ କଲେ ଔଷଧ ମିଳିବ ନାହିଁ ବୋଲି କୃଷି ଅଧିକାରୀ ଭାଗ୍ୟଧର ସାହୁ କହିବାରୁ ଚାଷୀମାନେ ତାଙ୍କୁ ଗାଳିଗୁଲଜ କରିଥିଲେ। ଫଳରେ ୧୨ଶହରୁ ଊର୍ଦ୍ଧ୍ୱ ଚାଷୀଙ୍କୁ ମହଜୁଦ୍ ଥିବା ୧୬୦୦ ଲିଟର ଘାସମରା ଔଷଧ ଅଧାଦାମ୍ରେ ବଣ୍ଟନ କରାଯାଇଥିଲା। ଏ ଦିଗରେ କୃଷି ଅଧିକାରୀ ସାହୁଙ୍କୁ ପଚାରିବାରେ ଘାସମରା ଔଷଧ ଷ୍ଟକ୍ ସୀମିତ ଥିବାରୁ ଚାଷୀମାନେ ଭିଡ଼ ମଧ୍ୟରେ ଠେଲାପେଲା ହୋଇଥିଲେ। ତେବେ ଚାଷୀମାନେ ପୋଲିସକୁ ଗାଲିଗୁଲଜ କରିବାରୁ ସେମାନେ ଭିଡସ୍ଥଳରୁ ଚାଲିଗଲେ। ଏହାସହ ଚାଷୀଙ୍କୁ ସାମାଜିକ ଦୂରତା ବଜାୟ ରଖିବା ସହ ମାସ୍କ ପିନ୍ଧିବାକୁ କହିବାରୁ ସେମାନେ କୃଷି ଅଧିକାରୀଙ୍କୁ ଗାଳିଗୁଲଜ କରିଥିଲେ ବୋଲି କହିଛନ୍ତି।
