ପାଟଣା, ୪ା୫(ସ୍ବ.ପ୍ର.)-କରୋନା ସଂକ୍ରମଣ ସକାଶେ ଦେଶ ଲକ୍ଡାଉନ ରହିଛି। ରାଜ୍ୟ ବାହାରକୁ କେରଳ, ତାମିଲନାଡୁ, ଚେନ୍ନାଇ, ମହାରାଷ୍ଟ୍ର ଓ ଆନ୍ଧ୍ରପ୍ରଦେଶକୁ କାମ କରିବାକୁ ଯାଇଥିବା କେନ୍ଦୁଝର ଜିଲା ପାଟଣା ବ୍ଲକରୁ ୧୨ଶହ ଶ୍ରମିକ ଫସିରହିଛନ୍ତି। ପାଟଣା ବ୍ଲକ କଣ୍ଟିଆପଡା ପଞ୍ଚାୟତରୁ କାମ କରିବାକୁ କେରଳ ରାଜ୍ୟର ଏର୍ଣ୍ଣ।କୁଲମ ଜିଲା ଆସମାନୁର ଉଡ଼ତାଲିଠାରେ ରହି ଏକ ପ୍ଲାଇବୋର୍ଡ କମ୍ପାନୀରେ କାମ କରୁଥିବା ୯ଜଣ ପ୍ରବାସୀ ଓଡ଼ିଆ ଶ୍ରମିକଙ୍କ ସହ ୩ଶିଶୁ ରବିବାର ରାତିରେ ପାଟଣା ମୁଖ୍ୟାଳୟସ୍ଥିତ ଫିଭର କ୍ଲିନିକରେ ସ୍ବାସ୍ଥ୍ୟ ପରୀକ୍ଷା କରିବା ପରେ କଣ୍ଟିଆପଡାସ୍ଥିତ କ୍ୱାରାଣ୍ଟାଇନ ସେଣ୍ଟରରେ ରଖାଯିବ ବୋଲି ପାଟଣା ବିଡ଼ିଓ ଈଶ୍ୱରଚନ୍ଦ୍ର ନାଏକ, ଥାନାଧିକାରୀ ସନ୍ଧ୍ୟାରାଣୀ ଜେନା ଓ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧିକାରୀ ସୁପ୍ରକାଶ ଶତପଥୀ ସୂଚନା ଦେଇଛନ୍ତି। ଉକ୍ତ କମ୍ପାନୀ ତରଫରୁ ସମସ୍ତ ଖାଦ୍ୟ ପଦାର୍ଥ ଦିଆଯାଉଥିଲା ବୋଲି ଶ୍ରମିକମାନେ ପ୍ରକାଶ କରିଛନ୍ତି। ଏହି ଶ୍ରମିକମାନଙ୍କ ୧ମାସର ଦରମା ପାଇ ନ ଥିବା କହିଛନ୍ତି। ଶ୍ରମିକମାନେ କେନ୍ଦ୍ର ସରକାରଙ୍କ ସହାୟତାରେ ସ୍ବତନ୍ତ୍ର ଟ୍ରେନ ଯୋଗେ ଶୁକ୍ରବାର ରାତି୧୦ଟାରେ କେରଳର ଏର୍ଣ୍ଣାକୁଲମ ଷ୍ଟେଶନରୁ ବାହାରି ରବିବାର ସକାଳେ ଖୋର୍ଦ୍ଧା ଷ୍ଟେଶନରେ ଓହ୍ଲାଇ ରାଜ୍ୟ ସରକାରଙ୍କ ଦ୍ୱାରା ବ୍ୟବସ୍ଥା କରାଯାଇଥିବା ଏକ ବସ୍ ଯୋଗେ କେନ୍ଦୁଝର ଜିଲାକୁ ଆସି ପହଞ୍ଚିଥିଲେ। ପ୍ରଶାସନ ସମସ୍ତ ଶ୍ରମିକଙ୍କୁ ନିଜ ନିଜ ଗ୍ରାମରେ ପହଞ୍ଚାଯାଇଛନ୍ତି। ପଞ୍ଚାୟତରେ ନିର୍ମିତ ହୋଇଥିବା କ୍ୱାରାଣ୍ଟାଇନ ଗୃହରେ ୧୪ଦିନ ସଙ୍ଗରୋଧରେ ରହିବା ପରେ ନିଜ ଘରକୁ ଯିବେ ବୋଲି ସୂଚନା ମିଳିଛି।
