ରାୟଗଡ଼ା ଅଫିସ,୭।୬: କେରଳରେ କାମ କରୁଥିବା ପ୍ରବାସୀ ଶ୍ରମିକ ସତନ୍ତ୍ର ଟ୍ରେନ ଯୋଗେ ଫେରିଛନ୍ତି। ୧୦୭୪ ଜଣ ପ୍ରବାସୀ ଶ୍ରମିକ କେରଳର ଆଲ୍ଲେପି ସମ୍ବଲପୁର ଟ୍ରେନରେ ରାୟଗଡ଼ା ଷ୍ଟେଶନରେ ପହଞ୍ଚିଛନ୍ତି । ଏତେ ସଂଖ୍ୟକ ପ୍ରବାସୀଙ୍କ ଆସିବା ଫଳରେ ଷ୍ଟେଶନ ଲୋକାରଣ୍ୟ ହୋଇଥିଲା। ଲକ୍ଡାଉନ୍ ଯୋଗୁ ବିଭନ୍ନ ସମସ୍ୟାର ସମ୍ମୁଖୀନ ହେଉଥିବା ଶ୍ରମିକମାନେ ନିଜନିଜ ଭିଟା ମାଟିକୁ ଫେରିବା ନିମନ୍ତେ ପଞ୍ଜିକୃତ କରିଥିଲେ। ସ୍ବତନ୍ତ୍ର ଶ୍ରମିକ ଟ୍ରେନ(୦୬୧୧୪)ନଂ.ରେ ଆସୁଥିବା ଖବର ରେଳ ବିଭାଗ ପକ୍ଷରୁ ଶନିବାର ଜିଲାପାଳ ପ୍ରମୋଦ କୁମାର ବେହେରାଙ୍କୁ ଜଣାଇଥିଲେ। ଜିଲାପାଳଙ୍କ ନିର୍ଦ୍ଦେଶ କ୍ରମେ ଶ୍ରମିକମାନଙ୍କୁ ସ୍ବାଗତ କରିବା ପାଇଁ ରାୟଗଡ଼ା ଷ୍ଟେଶନରେ ଜିଲା ଅଧିକାରୀମାନେ ରବିବାର ଭୋର୍ରୁ ସମସ୍ତ ପ୍ରକାର ବ୍ୟବସ୍ଥା କରି ଉପସ୍ଥିତ ରହିଥିଲେ। ସେଥିମଧ୍ୟରୁ ନବରଙ୍ଗପୁର ଜିଲାର ୨୯୭, କୋରପୁଟର ୨୯୨, ରାୟଗଡ଼ାର ୭୬ କନ୍ଧମାଳରୁ ୧୨୧, ଗଜପତି ୨୫, କଳାହାଣ୍ଡି ଜିଲାର ୭୯ ଓ ଗଞ୍ଜାମର ୧୮୪ ଜଣ ଶ୍ରମିକ ଆସିଥିଲେ । ସର୍ବମୋଟ ୧୦୭୪ଜଣ ଶ୍ରମିକ ଆଜି ରାୟଗଡ଼ାରେ ପହଞ୍ଚିଛନ୍ତି । ପ୍ରବାସୀ ଶ୍ରମିକ ଆସିବା ଖବର ପାଇ ପ୍ରଶାସନ ତରଫରୁ ଶନିବାର ସ୍ଥାନୀୟ ଗଜପତି ଛକରୁ ସାଇ ଇଣ୍ଟରନ୍ୟାଶନାଲ ଛକ ପର୍ଯ୍ୟନ୍ତ ଓ ଷ୍ଟେଶନ ଏରିଆରେ ୧୪୪ ଧାରା ଜାରି କରିଥିଲେ ।
