କବିସୂର୍ଯ୍ୟନଗର,୨୩ା୫-କରୋନା ଯୋଗୁ ସରକାରଙ୍କ ତରଫରୁ ସ୍କୁଲ, କଲେଜ, କୋଚିଂ ସେଣ୍ଟର ବନ୍ଦ କରିବାକୁ ନିର୍ଦ୍ଦେଶ ରହିଛି। ମାତ୍ର ଇ-ଶିକ୍ଷାଦାନ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି। ବୃଦ୍ଧ ଓ କୋମଳମତି ପିଲା ବାହାରକୁ ବାହାରିବା ସମ୍ପୂର୍ଣ୍ଣ ବାରଣ କରାଯାଇଛି। କିନ୍ତୁ ବହୁ କୋଚିଂ ସେଣ୍ଟର ଛୋଟ ପିଲାଙ୍କ ଭବିଷ୍ୟତ ନେଇ ଖେଳ ଖେଳୁଥିବା ବୁଦ୍ଧିଜୀବୀ ମହଲରେ ଅଭିଯୋଗ ହେଉଛି। ଅଭିଯୋଗକୁ ଭିତ୍ତିକରି ତହସିଲଦାର ପ୍ରକାଶ କୁମାର ମିଶ୍ର, ଷ୍ଟାଫ ଓ ପୋଲିସ କର୍ମଚାରୀ ପଥରା ଗ୍ରାମର ମୁଖ୍ୟ ରାସ୍ତାରେ ଚାଲୁଥିବା କୋଚିଂ ସେଣ୍ଟର ଉପରେ ଚଢ଼ାଉ କରିଥିଲେ। ଛାତ୍ରୀଛାତ୍ର ଓ ପଢ଼ାଉଥିବା ଶିକ୍ଷକ ପଛପଟ ଦେଇ ଫେରାର ହୋଇଯାଇଥିଲେ। ପରେ ସମ୍ପୃକ୍ତ ଶିକ୍ଷକଙ୍କୁ ତାଗିଦ କରି ତହସିଲଦାର ମିଶ୍ର ଛାଡ଼ିଥିଲେ । ଏହାର ପୁରାନବୃତ୍ତି ଘଟିଲେ ଘର ସିଲ୍ ସହ ଦଣ୍ଡବିଧାନ କରାଯିବ ବୋଲି ଚେତାଇ ଦେଇଥିଲେ।
ପ୍ରକାଶ ଯେ, କବିସୂର୍ଯ୍ୟନଗର ଏନ୍ଏସିର ଧୋବା ସାହି, ଗୋପୀନାଥପାଟଣା, ମାଳିସାହି, ଦେଶୀବେହେରା ସାହି, ପାଟସିଲା ସାହି, ବ୍ଲକ ପଛ, ଗାୟତ୍ରୀ ମନ୍ଦିର ନିକଟରେ କୋଚିଂ ସେଣ୍ଟର ଚାଲିଥିବା ଅଭିଯୋଗ ହେଉଛି। ସେହିପରି ସିଆଳିଆ, ବଡ଼ଆଗୁଳ ଛକ, ବାଲ୍ୟସରା, ବରିଡ଼ା ଓ ଆଠଗଡ଼ ଆଦି ପଞ୍ଚାୟତଗୁଡ଼ିକରେ ଟ୍ୟୁଶନ ହେଉଥିବା ଦେଖିବାକୁ ମିଳିଛି। ଏ ଦିଗରେ ଜିଲାପାଳ ତୁରନ୍ତ ଦୃଷ୍ଟି ଦେଇ ପିଲାଙ୍କୁ କରୋନା ସଂକ୍ରମଣରୁ ରକ୍ଷା କରିବାକୁ ଦାବି ହେଉଛି।
