କେନ୍ଦୁଝର,୨୬ା୫(ଡି.ଏନ୍.ଏ.)-ଛଟେଇ ପ୍ରତିବାଦରେ କେନ୍ଦୁଝର ସହର ଉପକଣ୍ଠ ରାଙ୍କିସ୍ଥିତ ସ୍ବତନ୍ତ୍ର କୋଭିଡ଼ ହସ୍ପିିଟାଲ୍ର କର୍ମଚାରୀମାନେ ସୋମବାର ଆନ୍ଦୋଳନରେ ବସିଥିଲେ। କୋଭିଡ ହସ୍ପିଟାଲ ପାଇଁ ସମସ୍ତ ଖର୍ଚ୍ଚ ଜିଲା ଖଣିଜ ପାଣ୍ଠିରୁ ପ୍ରଦାନ କରାଯାଉଥିବାବେଳେ ଏହାର ପରିଚାଳନା ଦାୟିତ୍ୱ ଉକତ୍ଳ ହସ୍ପିଟାଲ ନାମକ ଏକ ଘରୋଇ ସଂସ୍ଥାକୁ ଦିଆଯାଇଛି। ଉକ୍ତ ସଂସ୍ଥା ୪୬ଜଣ ସ୍ଥାନୀୟ ଯୁବକ ଯୁବତୀଙ୍କୁ ହାଉସ୍ କିପିଂ, ସଫେଇ କର୍ମଚାରୀ ଭାବେ ନିଯୁକ୍ତି ଦେଇଥିଲା। ସଂସ୍ଥା ପକ୍ଷରୁ ସମ୍ପୃକ୍ତ ଯୁବତୀଯୁବକଙ୍କୁ କଥା ମୁତାବକ ଦରମା ଦିଆଯାଉ ନ ଥିବା କର୍ମଚାରୀମାନେ ଅଭିଯୋଗ କରିଛନ୍ତିି। ଏପରିକି ପୂର୍ବରୁ ସେମାନଙ୍କୁ ୮ଘଣ୍ଟା କାମ କରିବ କହି ସଂସ୍ଥା ନିଯୁକ୍ତି ଦେଇଥିଲେ ମଧ୍ୟ ୧୨ ଘଣ୍ଟା ଡ୍ୟୁଟି ଦିଆଯିବା ସହ ଦରମା କମ୍ ଦିଆଯାଉଥିବା ସେମାନେ ଅଭିଯୋଗ କରିଛନ୍ତିି। ଏହାର ପ୍ରତିବାଦ କରିବାରୁ କେତେକ କର୍ମଚାରୀଙ୍କୁ ସଂସ୍ଥା ପକ୍ଷରୁ ଛଟେଇ କରି ଦିଆଯିବା ସହ ତାଙ୍କର ପାଉଣା ମଧ୍ୟ ଦିଆଯାଇ ନ ଥିବା ଅଭିଯୋଗ ହୋଇଛି। ସୋମବାର ଏହାର ପ୍ରତିବାଦରେ କର୍ମଚାରୀମାନେ କୋଭିଡ୍ ହସ୍ପିଟାଲ ସମ୍ମୁଖରେ ଧାରଣା ଦେଇଥିଲେ। ଖବରପାଇ ସଂସ୍ଥାର ସିଇଓ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀମାନଙ୍କ ସହ ଆଲୋଚନା କରିଥିବା ସୂଚନା ମିଳିଛି। ଏସମ୍ପର୍କରେ କେନ୍ଦୁଝର ଉପଜିଲାପାଳ ରାମ ଚନ୍ଦ୍ର କିସ୍କୁଙ୍କୁ ପଚାରିବାରୁ ଉକ୍ତ ହସ୍ପିଟାଲର କର୍ମଚାରୀଙ୍କର ଦାବି ସମାଧାନ ହୋଇଯାଇଥିବା କହିଛନ୍ତି।
