ଲସ୍ ଏଞ୍ଜେଲ୍ସ,୩।୪(ପି.ଟି.)- କରୋନା ଭାଇରସ୍ ଏବେ ସାରା ବିଶ୍ୱରେ ମହାମାରୀର ରୂପ ନେଇଥିବାରୁ ଆସନ୍ତା ମାସରେ ଆୟୋଜନ ହେବାକୁ ଥିବା ପ୍ରଫେସ୍ନାଲ ଗଲ୍ଫର୍ସ ଅସୋସିଏଶନ (ପିଜିଏ) ଚାମ୍ପିୟନ୍ଶିପ୍ ବାତିଲ ହୋଇଛି। ଏହି ଚାମ୍ପିୟନଶିପ୍ ମେ’ ୧୯ରୁ ୨୪ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ଏବେ ଏହି ଚାମ୍ପିୟନଶିପ୍ ବାତିଲ ହୋଇଛି ବୋଲି ଆମେରିକୀୟ ଅଧିକାରୀମାନେ ସୂଚନା ଦେଇଛନ୍ତି। ଏହା ମିଚିଗାନର ବେଣ୍ଟନ ହର୍ବୋରରେ ଖେଳାଯିବାର କାର୍ଯ୍ୟକ୍ରମ ଥିଲା। ଗଲ୍ଫ ଅପେକ୍ଷା ସର୍ବସାଧାରଣଙ୍କ ସ୍ବାସ୍ଥ୍ୟ ଅଧିକ ଗୁରୁତ୍ୱପୂର୍ଣ୍ଣ। ତେଣୁ ଆମକୁ ଏହି ହାଇପ୍ରୋଫାଇଲ ଟୁର୍ନାମେଣ୍ଟ ବାତିଲ କରିବାକୁ ହେଲା। ଅବଶ୍ୟ ଏହା ଦ୍ୱାରା ଆମେ ନିରାଶ ହୋଇଛୁ ବୋଲି ପିଜିଏ ଅଫ୍ ଆମେରିକା ଚିଫ୍ ସେଥ ଓ୍ବ କହିଛନ୍ତି।
୨୦୨୧ ସିନିୟର ପିଜିଏ ଚାମ୍ପିୟନଶିପ୍ ଏବେ ଓକ୍ଲାହୋମାର ସଦର୍ନ ହିଲ୍ସ କଣ୍ଟ୍ରି କ୍ଲବରେ ଖେଳାଯିବ। ତେବେ ଏହି ଚାମ୍ପିୟନଶିପ୍ ୨୦୨୨ରେ ହାରବୋର ଶୋର୍ସକୁ ପ୍ରତ୍ୟାବର୍ତ୍ତନ କରିବ ବୋଲି ସ୍ପଷ୍ଟ କରାଯାଇଛି। ଯେବେଠୁ କୋଭିଡ-୧୯ ଆମେରିକାରେ ମହାମାରୀ ରୂପ ନେଇଛି ସେବେଠାରୁ ଗଲ୍ଫ ସବୁଠାରୁ କ୍ଷତି ସହିଛି। ଏହାପୂର୍ବରୁ ୟୁଏସ୍ ପିଜିଏ, ୟୁଏସ୍ ଏଲ୍ପିଜିଏ ଓ ୟୁରୋପିଆନ ଟୁର ଟୁର୍ନାମେଣ୍ଟକୁ ବନ୍ଦ ରଖାଯାଇଛି। ସେହିପରି ମାଷ୍ଟର୍ସ ଓ ପିଜିଏ ଚାମ୍ପିୟନଶିପ୍କୁ ସ୍ଥଗିତ ରଖାଯାଇଛି। ଏବେ ଦୁଇଟି ମେଜର ଟୁର୍ନାମେଣ୍ଟ ଯଥା ୟୁଏସ୍ ଓପନ ଓ ବ୍ରିଟିଶ ଓପନ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି।
