କେନ୍ଦୁଝର, ୧୬।୪( ସ୍ବ.ପ୍ର.)-ରାଜ୍ୟସରକାରଙ୍କର ବରିଷ୍ଠ ଅଧିକାରୀମାନ କରୋନା ସ୍ଥିତି ଓ ତାର ମୁକାବିଲା ପାଇଁ ପ୍ରସ୍ତୁତ କୋଭିଡ଼-୧୯ ହସ୍ପିଟାଲର ଚିକିତ୍ସା ପାଇଁ କରାଯାଇଥିବା ବ୍ୟବସ୍ଥାର ଅନୁଧ୍ୟାନ କରିବା ପାଇଁ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ଓ ମୁଖ୍ୟମନ୍ତ୍ରୀଙ୍କ ସଚିବ (୫ଟି) ଭି.କେ.ପାଣ୍ଡିଆନ ଗୁରୁବାର କେନ୍ଦୁଝର ଗସ୍ତ କରି ଫେରିଛନ୍ତି। ହେଲିକପ୍ଟରରେ ଆସି ରାଇସୁଆଁ ଏୟାରଷ୍ଟ୍ରିପରେ ଓହ୍ଲାଇ ସେଠାରୁ ରାସ୍ତା ପଥରେ ସଦର ବ୍ଲକ ଅନ୍ତର୍ଗତ ରାଙ୍କି ଠାରେ ଥିବା କୋଭିଡ-୧୯ ହସ୍ପିଟାଲକୁ ଯାଇ ସ୍ଥିତି ଅନୁଧ୍ୟାନ କରିଥିଲେ। ସେଠାରୁ ପୁରୁଣା ସହରରେ ଥିବା ସହରାଞ୍ଚଳ ଡାକ୍ତରଖାନା ବୁଲି ଜ୍ୱର ୱାର୍ଡକୁ ଦେଖି ଥିଲେ। ରାଇସୁଆଁରୁ ଫେରି ହେଲିକପ୍ଟରରେ ବାରିପଦା ଯାଇଥିଲେ। କୋଭିଡ ହସ୍ପିଟାଲ କାର୍ଯ୍ୟର ଅଗ୍ରଗତିର ତଦାରଖ କରିବା ସହ ହସପିଟାଲରେ କରାଯାଇଥିବା ଆଇସିୟୁ ୟୁନିଟ, ଭେଣ୍ଟିଲେଟର ବ୍ୟବସ୍ଥାର ନିରୀକ୍ଷଣ କରିଥିଲେ। ହସପିଟାଲ ଦାୟିତ୍ୱରେ ଥିବା ଘରୋଇ ସଂସ୍ଥା ଓ ଜିଲା ପ୍ରଶାସନ ସହ ଆଲୋଚନା କରି ଖୁବ ଶୀଘ୍ର କାମ ଶେଷ କରିବାକୁ ନିର୍ଦ୍ଦେଶ ଦେଇଥିଲେ।
