ତ୍ରିନିଦାଦ,୧୨।୮- ପୋର୍ଟ ଅଫ୍ ସ୍ପେନସ୍ଥିତ କୁଇନ୍ସ ପାର୍କ ଓଭାଲଠାରେ ପ୍ରଥମେ ବିରାଟ କୋହଲିଙ୍କ ଶତକ ଓ ପରେ ଭୁବନେଶ୍ୱର କୁମାର (ଭୁବି)ଙ୍କ ଘାତକ ବୋଲିଂ ବଳରେ ଓ୍ବେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଦିନିକିଆ ମ୍ୟାଚ୍କୁ ଭାରତୀୟ ଦଳ ଡିଏଲଏସ୍ ନିୟମରେ ୫୯ ରନ୍ରେ ଜିତି ନେଇଛି। ଏହି ବିଜୟ ସହ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ଭାରତ ୧-୦ରେ ଆଗୁଆ ରହିଛି। ସିରିଜର ପ୍ରଥମ ମ୍ୟାଚ୍ ବର୍ଷା ଯୋଗୁ ଧୋଇ ହୋଇଯାଇଥିଲା। ଅନ୍ତିମ ମ୍ୟାଚ୍ ବୁଧବାର ସମାନ ଭେନ୍ୟୁରେ ଖେଳାଯିବ। ଦିନିକିଆ କ୍ୟାରିୟରର ୪୨ତମ ଶତକ ହାସଲ କରିଥିବା କୋହଲିଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଛି।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଟିମ୍ ଇଣ୍ଡିଆ ଧାର୍ଯ୍ୟ ୫୦ ଓଭରରେ ୭ ଉଇକେଟ ହରାଇ ୨୭୯ ରନ୍ କରିଥିଲା। ଦଳ ପାଇଁ କୋହଲି ସର୍ବାଧିକ ୧୨୦ ଓ ଯୁବ ବ୍ୟାଟ୍ସମ୍ୟାନ ଶ୍ରେୟାସ ଆୟାର ୭୧ ରନ୍ କରିଥିଲେ। ଅନ୍ୟମାନଙ୍କ ମଧ୍ୟରେ ରିଷଭ ପନ୍ତ (୨୦), ରୋହିତ ଶର୍ମା (୧୮), ରବୀନ୍ଦ୍ର ଜାଡେଜା (୧୬) ଓ କେଦାର ଯାଦବ (୧୬) ବଡ଼ ଇନିଂସ ଖେଳିବାରେ ବିଫଳ ହୋଇଥିଲେ। ଘରୋଇ ଦଳ ପାଇଁ କାର୍ଲୋସ ବ୍ରାଥଓ୍ବେଟ ୩ ଉଇକେଟ ନେଇଥିଲେ। ପରେ ବର୍ଷା ଯୋଗୁ ଡିଏଲଏସ୍ ନିୟମ ଅନୁଯାୟୀ ଓ୍ବେଷ୍ଟଇଣ୍ଡିଜ ଆଗରେ ୪୬ ଓଭରରେ ୨୭୦ ରନ୍ର ବିଜୟଲକ୍ଷ୍ୟ ଧାର୍ଯ୍ୟ ହୋଇଥିଲା। ଜବାବରେ ଇଭିନ ଲୁଇସଙ୍କ ୬୫ ଓ ନିକୋଲାସ ପୁରନଙ୍କ ୪୨ ରନ୍ର ଇନିଂସ ସତ୍ତ୍ୱେ ଓ୍ବେଷ୍ଟଇଣ୍ଡିଜ ଦଳ ୪୨ ଓଭରରେ ୨୧୦ ରନ୍ରେ ଅଲଆଉଟ୍ ହୋଇଯାଇଥିଲା। କ୍ୟାରିୟରର ଅନ୍ତିମ ଅନ୍ତର୍ଜାତୀୟ ସିରିଜ ଖେଳୁଥିବା କ୍ରିସ୍ ଗେଲ (୧୧) ଆଖିଦୃଶିଆ ପ୍ରଦର୍ଶନ କରିପାରି ନ ଥିଲେ। ତାଙ୍କ ଭଳି ଶାଇ ହୋପ (୫), ଶିମରୋନ ହେଟମାଇର (୧୮), ରୋଷ୍ଟନ ଚେଜ (୧୮), ଜାସୋନ ହୋଲ୍ଡର (୧୩*) ଓ ଶେଲ୍ଡନ କଟ୍ରେଲ (୧୭) ମଧ୍ୟ ଫେଲ୍ ମାରିଥିଲେ। ବିଜୟୀ ଦଳ ପକ୍ଷରୁ ଭୁବି ସର୍ବାଧିକ ୪ ଉଇକେଟ ନେଇଥିବାବେଳେ ମହମ୍ମଦ ସାମି ଓ କୁଲଦୀପ ଯାଦବ ୨ଟି ଲେଖାଏ ସଫଳତା ପାଇଥିଲେ।
ସଂକ୍ଷିପ୍ତ ସ୍କୋର:
ଭାରତ- ୫୦ ଓଭରରେ ୨୭୯/୭ (ବିରାଟ କୋହଲି ୧୨୦, ଶ୍ରେୟାସ ଆୟାର ୭୧, କାର୍ଲୋସ ବ୍ରାଥଓ୍ବେଟ ୩/ ୫୩)।
ଓ୍ବେଷ୍ଟଇଣ୍ଡିଜ- ୪୨ ଓଭରରେ ୨୧୦/ ଅଲଆଉଟ୍ (ଇଭିନ ଲୁଇସ ୬୫, ନିକୋଲାସ ପୁରନ ୪୨, ଭୁବନେଶ୍ୱର କୁମାର ୪/୩୧, ମହମ୍ମଦ ସାମି ୨/୩୯)।
