ନୂଆଦିଲ୍ଲୀ, ୭।୫-ସାମ୍ପ୍ରତିକ ଭାରତୀୟ କ୍ରିକେଟ ଦଳରେ ବିରାଟ କୋହଲି ଜଣେ ଦକ୍ଷ ଖେଳାଳି, ଏଥିରେ ଦ୍ୱିମତ ନାହିଁ। ମାତ୍ର ଅଧିନାୟକଭାବେ ତାଙ୍କୁ ଆହୁରି ଅନେକ ବାଟ ଯିବାକୁ ଅଛି ବୋଲି ଅନୁଭବ କରୁଛନ୍ତି ପୂର୍ବତନ ଦ୍ରୁତ ବୋଲର ଆଶିଷ ନେହେରା। ”ଜଣେ ଖେଳାଳିଭାବେ କୋହଲିଙ୍କ ସମ୍ପର୍କରେ କିଛି କହିବା ଆବଶ୍ୟକ ନାହିଁ। ତାଙ୍କ କ୍ୟାରିୟର ଗ୍ରାଫ୍ ହିଁ ସବୁକଥା କହିଥାଏ। ମାତ୍ର ଜଣେ ଅଧିନାୟକ ପ୍ରସଙ୍ଗ ଉଠିଲେ ସେ ଆହୁରି ଅନେକ ବାଟ ଯିବାକୁ ଅଛି ବୋଲି ଅନୁଭବ ହୁଏ। ସେ ଜଣେ ଭାବପ୍ରବଣ ଅଧିନାୟକ“ ବୋଲି ନେହେରା ପ୍ରକାଶ କରିଛନ୍ତି। କ୍ୟାରିୟରରେ ୧୭ ଟେଷ୍ଟ, ୧୨୦ ଦିନିକିଆ ଓ ୨୭ଟି ଟି୨୦ ଅନ୍ତର୍ଜାତୀୟ ମ୍ୟାଚ ଖେଳିଥିବା ନେହେରାଙ୍କ ମତରେ ୨୦୦୦ରେ ଖେଳୁଥିବା ଅଷ୍ଟ୍ରେଲିଆଠାରୁ ଭାରତୀୟ ଦଳ ବହୁତ ପଛରେ ଅଛି। ସେତେବେଳର ଅଷ୍ଟ୍ରେଲିଆ ଦଳ କ୍ରମାଗତ ୩ଟି ବିଶ୍ୱକପ ଜିତିବା ସହ ୧୯୯୬ ବିଶ୍ୱକପ ଫାଇନାଲ ଖେଳିଥିଲା। ଏହା ବ୍ୟତୀତ ଘରୋଇ ଏବଂ ବାହାର ପରିବେଶରେ ଏହି ଦଳ ୧୮-୧୯ ଟେଷ୍ଟ ମ୍ୟାଚ ମଧ୍ୟ ଜିତିଥିଲା । ”ଭାରତୀୟ ଦଳ ସେପରି ସଫଳତା ପାଇ ପାରିବନି ବୋଲି ମୁଁ କହୁନି। ତେବେ ଏଥିପାଇଁ ଏକ କୋର୍ ଗ୍ରୁପ ପ୍ରସ୍ତୁତ ହେବା ନିହାତି ଆବଶ୍ୟକ। ଖାଇବା ଟେବୁଲ ଉପରେ ଜଣେ ଅନେକ ପ୍ରକାର ଖାଦ୍ୟ ଦେଖି ଦ୍ୱନ୍ଦ୍ୱରେ ପଡ଼ିପାରେ। ତେଣୁ ଅଳ୍ପ ପ୍ରକାର ହେଉପଛେ ତାହା ସୁସ୍ବାଦୁ ହେବା ଗୁରୁତ୍ୱପୂର୍ଣ୍ଣ“ ବୋଲି ନେହେରା କହିଛନ୍ତି।
ପନ୍ତ୍ଙ୍କୁ ସମର୍ଥନ ଆବଶ୍ୟକ
କ୍ୟାରିୟର ଆରମ୍ଭରେ ରିଷଭ ପନ୍ତ୍ଙ୍କୁ ମହେନ୍ଦ୍ର ସିଂ ଧୋନୀଙ୍କ ଉତ୍ତରାଧିକାରୀ ବୋଲି ବିବେଚନା କରାଯାଉଥିଲା। ତେଣୁ ଏଥିପାଇଁ ଟିମ୍ ମ୍ୟାନେଜମେଣ୍ଟ ତାଙ୍କୁ ଦୀର୍ଘଦିନଧରିି ସମର୍ଥନ କରିବା ଆବଶ୍ୟକ। କେବଳ ତାଙ୍କୁ ନୁହେଁ ଅନ୍ୟ ପ୍ରତିଭାଧର ଖେଳାଳିଙ୍କୁ ମଧ୍ୟ କ୍ରମାଗତ ସମର୍ଥନର ଆବଶ୍ୟକତା ରହିଛି। ବର୍ତ୍ତମାନ ଭାରତୀୟ ଦଳର ୫ ଓ ୬ ନମ୍ବର ସ୍ଥାନରେ ବାରମ୍ବାର ପରିବର୍ତ୍ତନ ହେଉଛି। ଲୋକେଶ ରାହୁଲଙ୍କୁ ୫ ନମ୍ବର ସ୍ଥାନରେ ଖେଳାଯାଉଛି। ମାତ୍ର ଧୋନୀଙ୍କ ଉତ୍ତରାଧିକାରୀ କୁହା ଯାଉଥିବା ପନ୍ତ୍ ପଡ଼ିଆକୁ ପାଣି ବୋହୁଛନ୍ତି। କରୋନା ଭାଇରସ୍ ସଂକ୍ରମଣ ପ୍ରଭାବ ଯୋଗୁ କ୍ରିକେଟ ବନ୍ଦ ହେବା ପୂର୍ବରୁ ପନ୍ତ ଭାରତୀୟ ଦଳରେ ନିଜ ସ୍ଥାନ ହରାଇଥିଲେ। ତାଙ୍କ ପ୍ରଦର୍ଶନରେ ସ୍ଥିରତା ନ ରହିବାରୁ ଟିମ୍ ମ୍ୟାନେଜମେଣ୍ଟ ରାହୁଲଙ୍କୁ ଉଇକେଟ କିିପିଂ ଦାୟିତ୍ୱ ଅର୍ପଣ କରିଥିଲା। ପନ୍ତ୍ ବହୁତ ସୁଯୋଗ ହାତଛଡ଼ା କରିଛନ୍ତି ଏଥିରେ ଦ୍ୱିମତ ନାହିଁ, ମାତ୍ର ଜଣେ ଯୁବ ଖେଳାଳି ହୋଇଥିବାରୁ ସେ ବହୁତ ଆଗକୁ ଯିବାର ଦକ୍ଷତା ରଖିଛନ୍ତି ବୋଲି ନେହେରା ପ୍ରକାଶ କରିଛନ୍ତି।
