ବ୍ରହ୍ମପୁର ଅଫିସ,୧୬ା୧୧-ଗଞ୍ଜାମ ଜିଲା ବୈଦ୍ୟନାଥପୁର ଥାନା ଅନ୍ତର୍ଗତ ବ୍ରହ୍ମପୁର ବଡ ମେଡିକାଲ ଖେଳ ପଡ଼ିଆରେ ଶୁକ୍ରବାର କ୍ରିକେଟ ଖେଳ ବେଳେ ଏକ ଦୁର୍ଘଟଣା ଘଟିଛି। କ୍ରିକେଟ ବଲ ବାଜି ଜଣେ ମେଡିକାଲ ଛାତ୍ରଙ୍କ ମୃତ୍ୟୁ ହୋଇଛି। ମୃତକ ହେଲେ ବିଶ୍ୱଭୂଷଣ ସାହୁ (୨୪)। ତାଙ୍କ ଘର ପୋଲସରା ଥାନା ଅନ୍ତର୍ଗତ ଚଞ୍ଚଣିଆପଲ୍ଲୀ ବୋଲି ମେଡିକାଲ ଫାଣ୍ଡି ପୋଲିସ ସୂଚନା ଦେଇଛି। ଛାତ୍ରଙ୍କ ମୃତଦେହ ଜବତ କରି ପୋଲିସ ନଂ.୬୦୪/୧୯ରେ ଏକ ଅପମୃତ୍ୟୁ ମାମଲା ରୁଜୁ କରିଛି।
ପ୍ରକାଶ ଯେ, ବିଶ୍ୱଭୂଷଣ କୋରାପୁଟ ଲକ୍ଷ୍ମଣ ନାୟକ ମେଡିକାଲ କଲେଜର ୨ୟ ବର୍ଷ ଏମ୍ବିବିଏସ୍ ଛାତ୍ର ଥିଲେ। ତାଙ୍କ ବାପା ଲିଙ୍ଗରାଜ ବ୍ରହ୍ମପୁର ଲାଞ୍ଜିପଲିରେ ଏକ ଘର ଭଡା ନେଇ ରହୁଛନ୍ତି। କିଛିଦିନ ତଳେ ବିଶ୍ୱଭୂଷଣ ଛୁଟିରେ ଘରକୁ ଆସିଥିଲେ। ସେ ଶୁକ୍ରବାର ସକାଳେ ସାଙ୍ଗମାନଙ୍କ ସହ କ୍ରିକେଟ ଖେଳିବା ପାଇଁ ମେଡିକାଲ କଲେଜ ଖେଳ ପଡିଆକୁ ଯାଇଥିଲେ। ବିଶ୍ୱଭୂଷଣ ବ୍ୟାଟିଂ କରୁଥିବା ବେଳେ ଅନ୍ୟପଟୁ ବୋଲିଂ ହେଉଥିଲା। ଏକ ବଲ ତାଙ୍କ କାନରେ ବାଜିଥିଲା। ଫଳରେ ସେ ତଳେ ଅଚେତ ହୋଇ ପଡିଯାଇଥିଲେ। ସାଙ୍ଗମାନେ ତାଙ୍କୁ ତୁରନ୍ତ ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରିଥିଲେ। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
