କୋଲକାତା,୨୦।୯(ପିଟି): ଏଠାରେ କ୍ରିକେଟ ଉପରେ ଆଧାରିତ ରେଷ୍ଟୁରାଣ୍ଟକୁ ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲି ଶୁକ୍ରବାର ଉଦ୍ଘାଟନ କରିଛନ୍ତି। ରେଷ୍ଟୁରାଣ୍ଟରେ ରହିଛି ଭାରତୀୟ କ୍ରିକେଟର ୧୦୦ରୁ ଅଧିକ ସ୍ମାରକୀ। ‘ମୁଁ ଶ୍ରୀଲଙ୍କା, ଇଂଲଣ୍ଡ ଭଳି ଦେଶରେ କ୍ରିକେଟ ଉପରେ ଆଧାରିତ ରେଷ୍ଟୁରାଣ୍ଟ ଦେଖିଛି। କିନ୍ତୁ ଏହା ସମ୍ପୂର୍ଣ୍ଣ ଭିନ୍ନ। ଏଥିରେ ବହୁ ସ୍ମରଣୀୟ ମୂହୁର୍ତ୍ତ ରହିଛି। କ୍ରିକେଟ ଫ୍ୟାନମାନଙ୍କ ପାଇଁ ଏହା ଉପଯୋଗୀ ରେଷ୍ଟୁରାଣ୍ଟ’ ବୋଲି ଗାଙ୍ଗୁଲି କହିଛନ୍ତି। ରେଷ୍ଟୁରାଣ୍ଟରେ ସ୍ଥାନ ପାଇଥିବା ସ୍ମାରକୀରେ କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର, ବିରାଟ କୋହଲି, ମହେନ୍ଦ୍ର ସିଂ ଧୋନୀ, ଭିଭିଏସ୍ ଲକ୍ଷ୍ମଣ, ଶାହିଦ ଆଫ୍ରିଦୀ, କ୍ରିସ ଗେଲ, ଡେଭିଡ ଓ୍ବାର୍ନରଙ୍କ ଭଳି ବହୁ କ୍ରିକେଟରଙ୍କ ହସ୍ତାକ୍ଷର ରହିଛି। ବିଭିନ୍ନ ଆଇପିଏଲ ଫ୍ରାଞ୍ଚାଇଜରେ କାର୍ଯ୍ୟ କରିଥିବା ମୋଇନ ବିନ ମକସୁଦ ଏହି ସବୁ ସ୍ମାରକୀକୁ ସଂଗ୍ରହ କରିଛନ୍ତି। ଏହି ରେଷ୍ଟୁରାଣ୍ଟରେ ପ୍ୟାଭିଲିୟନ ମଧ୍ୟ ରହିଛି। ଏଠାରେ ପାରମ୍ପରିକ ତନ୍ଦୁର, ଇଣ୍ଡିଆନ ଓ ଚାଇନିଜ ଫୁଡ୍ ମିଳିବ।
