ବ୍ରହ୍ମପୁର ଅଫିସ, ୭।୮- ବ୍ରହ୍ମପୁର ଉପକଣ୍ଠ ଚଣ୍ଡିପଦରସ୍ଥିତ ପାରଳା ମହାରାଜା ଇଂଜିନିୟରିଂ କଲେଜ ଛାତ୍ରାବାସ-୧ରେ ମଙ୍ଗଳବାର ଗ୍ୟାସ୍ ପାଇପ୍୍ ଫାଟି ୩ ଛାତ୍ର ଆହତ ହେବା ଘଟଣାକୁ ନେଇ ବୁଧବାର ଛାତ୍ରମାନେ ଆନ୍ଦୋଳନକୁ ଓହ୍ଲାଇଛନ୍ତି। ବୁଧବାର ସକାଳୁ ଛାତ୍ରମାନେ କଲେଜ ଫାଟକରେ ତାଲା ପକାଇ ଆନ୍ଦୋଳନ କରିଛନ୍ତି। ମଙ୍ଗଳବାର ଘଟିଥିବା ଘଟଣାରେ ଆହତ ଛାତ୍ରଙ୍କୁ କ୍ଷତିପୂରଣ ପ୍ରଦାନ କରିବା ସହ କ୍ୟାଣ୍ଟିନ୍ନ ପରିଚାଳକଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି। ଏଥିସହ ହଷ୍ଟେଲରେ ଅନୁପସ୍ଥିତ ସମୟର ନିଆଯାଉଥିବା ମେସ ବିଲ ହ୍ରାସ କରିବା, କଲେଜରେ ମେଡିକାଲ ଓ ଆମ୍ବୁଲାନ୍ସ ସୁବିଧା କରିବା, ହଷ୍ଟେଲରେ ଅଗ୍ନି ନିର୍ବାପକ ଯନ୍ତ୍ର ସହ ଛାତ୍ରଙ୍କ ସୁରକ୍ଷା ନିମିତ୍ତ ସମସ୍ତ ପଦକ୍ଷେପ ଗ୍ରହଣ କରିବା, ହଷ୍ଟେଲରେ ଭଲ ଖାଦ୍ୟ ପ୍ରଦାନ କରାଯିବା ଭଳି ଦାବି ନେଇ ଛାତ୍ରମାନେ ଆନ୍ଦୋଳନ କରିଛନ୍ତି ।
ସୂଚନା ଯୋଗ୍ୟ, ମଙ୍ଗଳବାର ସକାଳେ ଛାତ୍ରାବାସ ୧ରେ ଜଳଖିଆ ରୋଷେଇ ବେଳେ ରନ୍ଧନ ଗ୍ୟାସ ପାଇପ ଫାଟି ମୁକେଶ ପଣ୍ଡା, ରାକେଶ ରାଉତ, ଅଶ୍ୱିନୀ ନାୟକ ପ୍ରମୁଖ ୩ ଛାତ୍ର ଓ ରୋଷେୟା ଆହତ ହୋଇଥିଲେ। ପୂର୍ବରୁ ବହୁବାର ହଷ୍ଟେଲର ରୋଷେଇଘର ଗ୍ୟାସ ପାଇପକୁ ବଦଳାଇବାକୁ କତ୍ତୃପକ୍ଷଙ୍କୁ ଛାତ୍ରମାନେ କହିଥିଲେ ମଧ୍ୟ କତ୍ତୃପକ୍ଷ ଧ୍ୟାନ ଦେଇ ନ ଥିବାରୁ ଏଭଳି ଘଟଣା ଘଟିଥିବା ଅଭିଯୋଗ ହୋଇଥିଲା। ଏହା ବ୍ୟତୀତ କଲେଜ ପରସରରେ ଆସୁ ଚିକିତ୍ସା ବ୍ୟବସ୍ତା ଓ ଅଗ୍ନି ନିରାପତ୍ତା ବ୍ୟବସ୍ଥା ନ ଥିବାକୁ ନେଇ ମଧ୍ୟ ଛାତ୍ରଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ।
