ଏୟାରପୋର୍ଟରେ ଯାତ୍ରୀମାନଙ୍କ ସୁବିଧା ନିମନ୍ତେ ଏମିତି ବିଶ୍ରାମକକ୍ଷ ନିର୍ମାଣ କରାଯାଇଛି ଯେଉଁଠି ସମସ୍ତ ସୁବିଧା ଉପଲବ୍ଧ। ଆରାମରେ ବସିବା ସହିତ ଇଣ୍ଟରନେଟ୍ ସୁବିଧା ମଧ୍ୟ ରହିଛି। ଏମିତି ଆରାମଦାୟକ ବିଶ୍ରାମକକ୍ଷ ନିର୍ମାଣ କରାଯାଇଛି ଚାଇନାର ଜୋଝିୟାଙ୍ଗସ୍ଥିତ ହଙ୍ଗଝୋହୁ ଇଣ୍ଟରନ୍ୟାଶନାଲ ଏୟାରପୋର୍ଟରେ। ଏହା ବେଶୀ ବଡ଼ ମଧ୍ୟ ନୁହେଁ। ଏଠାରେ କ୍ୟାପସୁଲ ସଦୃଶ ୮ଟି ବିଶ୍ରାମକକ୍ଷ ରହିଛି। ଏୟାରପୋର୍ଟର ଅଧିକାରୀ କୁହନ୍ତି, ଗୋଟିଏ ବିଶ୍ରାମକକ୍ଷ ୩ ମିଟର ବର୍ଗର ନିର୍ମାଣ କରାଯାଇଛି। କ୍ୟୁଆର କୋଡ୍ ସ୍କାନ୍ କଲେ ଏହାର ଗେଟ୍ ଖୋଲିଥାଏ। ଏଠାରେ ଯାତ୍ରୀମାନେ ବସିବା ପାଇଁ ଏକ ଆରାମଦାୟକ ଚେୟାର ରହିଛି।
ଖାଲି ସେତିକି ନୁହେଁ, ଏକ ବଟନ୍ ଦବାଇଲେ ଚେୟାରଟି ବେଡ୍ ପରି ହୋଇଯାଇଥାଏ। ଏଥିରେ ମୋବାଇଲ, ଲାପଟପ୍ ଚାର୍ଜ ହେବା ସହିତ ଇଣ୍ଟରନେଟ୍ର ମଧ୍ୟ ସୁବିଧା ରହିଛି। ଏହି ବିଶ୍ରାମକକ୍ଷରେ ଲଗେଜ୍ ରଖିବାରେ କୌଣସି ଅସୁବିଧା ହେବ ନାହିଁ। ଏହାବ୍ୟତୀତ ଫ୍ଲାଇଟ୍ ସମ୍ପର୍କରେ ଜାଣିବା ପାଇଁ ବାହାରକୁ ଯିବାକୁ ପଡ଼ିବନି। ନେଟ୍ ବ୍ୟବହାର କରିବା ସମୟରେ ଫ୍ଲାଇଟ୍ ସମ୍ପର୍କରେ ସମସ୍ତ ଅପ୍ଡେଟ୍ ଏହା ଭିତରେ ଜଣାପଡ଼ିଯିବ। ଏହି ବିଶ୍ରାମକକ୍ଷରେ ହାଇସ୍ପିଡ୍ ଓ୍ବାଇଫାଇ ସହିତ ଏୟାର ଫ୍ରେଶନର, ଏୟାର କଣ୍ଡିଶନର ଏବଂ ପାଓ୍ବାର ସକେଟ୍ ସୁବିଧା ମଧ୍ୟ ଉପଲବ୍ଧ।
