ଯୋଡ଼ା, ୪।୧୨(ଡି.ଏନ.ଏ.): କେନ୍ଦୁଝର ଜିଲା ବାମେବାରୀ ଥାନା ଅନ୍ତର୍ଗତ ଜୁରୁଡି ଖଣିରେ ସ୍ଥାନୀୟ ଲୋକଙ୍କୁ ନିଯୁକ୍ତି ଓ ପରିବହନ ସୁବିଧା ଦେବାପାଇଁ ମାରାଙ୍ଗବୁରୁ ଡେଭେଲପମେଣ୍ଟ କମିଟି ଦାବି କରି ଆସୁଥିବାବେଳେ ଏହାକୁ ଅନ୍ୟ କେତେକ ସ୍ଥାନୀୟ ଲୋକ ବିରୋଧ କରୁଛନ୍ତି। ବୁଧବାର ପୂର୍ବାହ୍ନରେ ମାରାଙ୍ଗବୁରୁ ଡେଭେଲପମେଣ୍ଟ କମିଟି ପକ୍ଷରୁ ଖଣିର ମୁଖ୍ୟ ଫାଟକ ସମ୍ମୁଖରେ ଧାରଣା ଦେଇଥିଲେ। ଖଣି କର୍ତ୍ତୃପକ୍ଷ ଦାବି ପୂରଣ ନେଇ କୌଣସି ଆଲୋଚନ ନ କରିବାରୁ କମିଟି ପକ୍ଷରୁ ଏହି ଧାରଣା ଦିଆଯାଇଥିଲା। ଏମାନଙ୍କୁ ବିରୋଧ କରୁଥିବା ନିକଟବର୍ତ୍ତୀ କେତେକ ଗ୍ରାମର ଶତାଧିକ ମହିଳାପୁରୁଷ ଠେଙ୍ଗା ବାଡି ଧରି ଅପରାହ୍ନ ବେଳକୁ ଖଣିର ପରିବହନ ଗେଟ୍ ସମ୍ମୁଖରେ ପହଞ୍ଚି ଅନଶନକାରୀଙ୍କ ଉପରେ ଚଢ଼ାଉ କରିଥିଲେ। ସେଠାରେ ଦୁଇ ଗୋଷ୍ଠୀ ମୁହାଁମୁହିଁ ହେବାରୁ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ବାମେବାରୀ ଥାନା ଓଆଇସି ପରେଶ କୁମାର ମହାନ୍ତି ଏକ ପ୍ଲାଟୁନ୍ ଫୋର୍ସ ସହ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲେ। ଏହି ସମୟ ମଧ୍ୟରେ ଧାରଣାକାରୀମାନେ ଉତ୍ତେଜିତ ହୋଇ ପ୍ରତିଆକ୍ରମଣ କରିବାକୁ ଉଦ୍ୟତ ହୋଇଥିଲେ। ପୋଲିସ ଉଭୟ ପକ୍ଷଙ୍କୁ ବୁଝାଶୁଝା କରିଥିଲେ ମଧ୍ୟ ଉଭୟ ପକ୍ଷ ଖଣି ପରିସରରୁ ନ ହଟିବାକୁ ଜିଦ୍ ଧରିଥିଲେ। ପରିସ୍ଥିତି ଅଣାୟତ ହେବାରୁ ଅପରାହ୍ନ ୩ଟା ସମୟରେ ଯୋଡା ଥାନା ଆଇଆଇସି ରାଇସେନ ମୁର୍ମୁ ଏବଂ ତହସିଲଦାର କ୍ଷୀରୋଦ କୁମାର ବେହେରା ପହଞ୍ଚି ଉଭୟ ପକ୍ଷଙ୍କୁ ବୁଝାଶୁଝା କରି ଖଣିର ପରିବହନ କାର୍ଯ୍ୟ ଚାଲୁ କରିଥିଲେ। ଅପରାହ୍ନ ପ୍ରାୟ ସାଢ଼େ ୪ଟା ସମୟରେ ମାଜିଷ୍ଟ୍ରେଟ୍ ଦାୟିତ୍ୱରେ ଥିବା ବଡବିଲ ତହସିଲଦାର ବେହେରା ଉଭୟ ପକ୍ଷର ମୁଖ୍ୟଙ୍କୁ ଡକାଇ ଏହାର ସମାଧାନ କରାଯିବ ବୋଲି କହିଥିଲେ। ଖବର ଲେଖା ହେଲା ବେଳକୁ ପରିସ୍ଥିତି ମଧ୍ୟ ଉତ୍ତେଜନା ପୂର୍ଣ୍ଣ ରହିଥିଲା।
