ଭୁବନ, ୩୧।୮(ଡି.ଏନ.ଏ.) ପାଦ ଥାପିଛି ଶରତ। ବିଦ୍ୟାଦାତା ଗଜାନନଙ୍କ ଆବାହନ ସହ ଆରମ୍ଭ ହେବ ପାର୍ବଣ ଋତୁ। ଏହାକୁ ନେଇ ଗଁ।ଠାରୁ ସହର ଯାଏ ସବୁଠି ସୃଷ୍ଟି ହୋଇଛି ଉତ୍ସବ ମୁଖର ପରିବେଶ। ଏପରି ମହୋତ୍ସବରେ ସାମିଲ ହୋଇଛି ଢେଙ୍କାନାଳ ଜିଲାର ଶିଳ୍ପୀଗ୍ରାମ ଭୁବନ। ଏଠାକାର ଗଣେଶ ପୂଜା ଜିଲାରେ ନିଆରା ପରିଚୟ ସୃଷ୍ଟି କରିଥିବାବେଳେ ଚଳିତବର୍ଷ ୨୦ ମଣ୍ଡପରେ ବିଘ୍ନରାଜଙ୍କ ଆବାହନ କରାଯାଉଛି। ପୂଜାକୁ ଆଉ ମାତ୍ର ୨ଦିନ ଥିବାବେଳେ ଏହାକୁ ନେଇ ଜୋର୍ ଧରିଛି ପ୍ରସ୍ତୁତି।
ଭୁବନ ଏନ୍ଏସିରେ ହେଉଥିବା ଗଣେଶ ପୂଜାରେ ସ୍ବତନ୍ତ୍ର ଛାପ ଛାଡ଼ିଛି ଗ୍ଲୋରିୟସ କ୍ଲବ। ଚଳିତବର୍ଷ କ୍ଲବର ପୂଜାକୁ ୧୨ବର୍ଷ ପୂରଣ ହେଉଛି। ଏହି ଉପଲକ୍ଷେ ପୂଜାକୁ ନିଆରା ଢଙ୍ଗରେ ପାଳନ କରାଯିବାକୁ କ୍ଲବ ପକ୍ଷରୁ ନିଷ୍ପତ୍ତି ହୋଇଛି। ଏଥିରେ ପାଖାପାଖି ୨୦ ଲକ୍ଷ ଟଙ୍କା ଖର୍ଚ୍ଚ ହେବ। ସୁଉଚ୍ଚ ମୂର୍ତ୍ତି, ଅତ୍ୟାଧୁନିକ ତୋରଣ, ଆଲୋକମାଳା, ସାଂସ୍କୃତିକ କାର୍ଯ୍ୟକ୍ରମ ପ୍ରମୁଖ ଆକର୍ଷଣ ସାଜିବ। ସେପ୍ଟେମ୍ବର ୨ରେ ପାରମ୍ପରିକ ନୀତିରେ ଗଣେଶଙ୍କ ପୂଜାର୍ଚ୍ଚନା ଆରମ୍ଭ ହେବ। ୪ତାରିଖରୁ ୩ଦିନ ଧରି ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ। ଭୁବନେଶ୍ୱରର ଜାଭେଦ୍ ଗ୍ରୁପ୍ ମେଲୋଡ଼ି, କ୍ରିଏଟିଭ୍ ଗ୍ରୁପ୍ ଏବଂ ବ୍ଲାକ୍ ଡାଇମଣ୍ଡ ଗ୍ରୁପ୍ର କଳାକାରମାନେ ନୃତ୍ୟସଙ୍ଗୀତ ପରିବେଷଣ କରି ଦର୍ଶକଙ୍କ ମନୋରଞ୍ଜନ କରିବେ। ଏଥିସହ ୨୦୦୦ ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା କରାଯାଇଛି। ଭସାଣି ଉତ୍ସବରେ ସମ୍ବଲପୁରୀ ନୃତ୍ୟ, ଖୋର୍ଦ୍ଧା ପାଇକ ଆଖଡ଼ା, ପୁରୀ ଘଣ୍ଟବାଦ୍ୟ, ସିଙ୍ଗବାଦ୍ୟ ପ୍ରମୁଖ ଆକର୍ଷଣ ସାଜିବ। ପୂଜାକୁ ଶୃଙ୍ଖଳିତ କରିବାକୁ କମିଟି ପକ୍ଷରୁ ନିଆରା ପ୍ରୟାସ କରାଯାଇଛି। ପୂଜା ପାଉଥିବା ୨୦ ମେଢ଼ ମଧ୍ୟରୁ ବିଭିନ୍ନ ବିଭାଗରେ ଉଚ୍ଚକୋଟୀର ପ୍ରଦର୍ଶନ କରିଥିବା ଶ୍ରେଷ୍ଠ ୩ କିମିଟିକୁ ପୁରସ୍କୃତ କରାଯିବ ବୋଲି ନିଷ୍ପତ୍ତି ହୋଇଛି।
