ହରିୟାଣା,୧୨।୧୧: ହରିୟାଣା ବିଧାନସଭାରେ ଏପର୍ଯ୍ୟନ୍ତ ମନ୍ତ୍ରୀମାନଙ୍କ ଶପଥଗ୍ରହଣ କାର୍ଯ୍ୟକ୍ରମ ହୋଇନାହିଁ। ଅକ୍ଟୋବର ୨୭ରୁ ମୁଖ୍ୟମନ୍ତ୍ରୀ ଭାବେ ଭାଜପାର ମନୋହର ଲାଲ ଖଟ୍ଟର ଶପଥ ନେଇଥିବା ବେଳେ ଜନନାୟକ ଜନତା ପାର୍ଟି(ଜେଜେପି) ନେତା ଦୁଷ୍ୟନ୍ତ ଚୌତାଲା ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ। ହେଲେ ଏହାପରେ ଆଉ କୌଣସି ମନ୍ତ୍ରୀ ଶପଥ ନେଇ ନାହାଁନ୍ତି। ଗୋଟିଏ ପଟେ ଦିଲ୍ଲୀ ପ୍ରଦୂଷଣ ଓ ଅନ୍ୟପଟେ ମହାରାଷ୍ଟ୍ର ରାଜନୀତିକୁ ନେଇ ଭାଜପା ଅଧ୍ୟକ୍ଷ ଅମିତ ଶାହ ବ୍ୟସ୍ତଥିବା ବେଳେ ହରିୟାଣା ଉପରେ ଦୃଷ୍ଟି ଦେଇ ନ ଥିବାରୁ ଏହା ବିଳମ୍ବ ହୋଇଛି ବୋଲି କୁହାଯାଉଛି। ଏବେ କିନ୍ତୁ ସବୁ ଆଲୋଚନା ସରିଥିବା ବେଳେ ମଙ୍ଗଳବାର କିମ୍ବା ବୁଧବାର ସୁଦ୍ଧା ହରିୟାଣା ବିଧାନସଭାର ମନ୍ତ୍ରୀମାନେ ଶପଥ ନେଇ ପାରନ୍ତି ବୋଲି ବିଶେଷ ସୂତ୍ରରୁ ଜଣାପଡିଛି।
