ଅନୁଗୋଳ ଅଫିସ, ୨୪।୪-ପ୍ରଥମ ଥର ପାଇଁ ଭୋଟ୍ ଦେବେ। ସେଥିପାଇଁ ଯୁବ ଭୋଟରମାନଙ୍କ ମଧ୍ୟରେ ବେଶ୍ ଉତ୍ସାହ ଥିଲା। କାଳେ କିଛି ଭୁଲ ହୋଇଯିବ ତାହାକୁ ନେଇ ମନରେ ଭୟ ବି ଟିକେ ଥିଲା। ହେଲେ ନିର୍ଭୁଲ ଭାବେ ଭୋଟ୍ ଦେବା ପରେ ଖୁସି ବ୍ୟକ୍ତ କରିଥିଲେ ଅନୁଗୋଳର କେତେଜଣ ଯୁବ ଭୋଟର। ପ୍ରଥମ ଥର ଏହି ଗଣପର୍ବରେ ସାମିଲ ହେବାର ସୌଭାଗ୍ୟ ପାଇଥିବାରୁ ଯୁବପିଢ଼ି ନିଜକୁ ଧନ୍ୟ ମନେ କରିଥିଲେ। ଏ ସମ୍ପର୍କରେ ଜଣେ ଯୁବ ଭୋଟର ଅପର୍ଣ୍ଣା ରଥ କହିଛନ୍ତି, ଇଭିଏମ୍ରେ କେମିତି ଭୋଟ ଦିଆଯାଏ ତାହା ଘର ଲୋକଙ୍କ ଠାରୁ ପଚାରି ବୁଝିଥିଲି। ତେଣୁ ଇଭିଏମ୍ ଓ ଭିଭିପିଏଟିର ବ୍ୟବହାର କରିବାରେ କିଛି ଅସୁବିଧା ହେଲାନାହିଁ। ଯିଏ ଯୁବ ପିଢ଼ିଙ୍କ ପାଇଁ କାର୍ଯ୍ୟ କରିବେ ସେପରି ଉପଯୁକ୍ତ ପ୍ରାର୍ଥୀ ଦେଖି ନିଜର ପ୍ରଥମ ମତ ସାବ୍ୟସ୍ତ କରିଛି। ସେହିପରି ସୌମ୍ୟାଜ୍ୟୋତି ପ୍ରଧାନ କହିଛନ୍ତି, ଭୋଟ କିପରି ଦିଆଯାଏ ତାହା ପୂର୍ବରୁ ପରିବାର ଲୋକଙ୍କଠାରୁ ଶୁଣିଥିଲି। ହେଲେ ପ୍ରଥମ ଥର ପାଇଁ ଭୋଟ ଦେଇଥିବାରୁ ଭାରି ଖୁସି ଲାଗୁଛି। ଯୁବ ଭୋଟରମାନେ ଅଧିକ ସଂଖ୍ୟାରେ ମତଦାନ କରି ଦେଶ ଗଠନରେ ସହାୟକ ହେବାର ଆବଶ୍ୟକତା ରହିଛି।
