ଜଟଣୀ,୮।୩(ଡି.ଏନ.ଏ.): ମାର୍ଚ୍ଚ ୮ରେ ବିଶ୍ୱ ମହିଳା ଦିବସ। ଏହି ପରିପ୍ରେକ୍ଷୀରେ ମହିଳାଙ୍କୁ ସମ୍ମାନ ଜଣାଇ ଖୋର୍ଦ୍ଧାରୋଡ଼ ରେଳ ଡିଭିଜନ ମାର୍ଚ୍ଚ ୧ରୁ ୧୦ ତାରିଖ ପର୍ଯ୍ୟନ୍ତ ଏହି ଦିବସ ପାଳନ କରୁଛି। ଏଥିପାଇଁ ବିଶ୍ୱ ମହିଳା ଦିବସ ଅଭିଯାନ ନାମରେ ବିଭିନ୍ନ କାର୍ଯ୍ୟକ୍ରମ ଚାଲିଛି। ‘ନାରୀ ଓ ପୁରୁଷ ପରସ୍ପର ସମତୁଲ’ ଶୀର୍ଷକ ସ୍ଲୋଗାନ ଦେଇ ଏହି କାର୍ଯ୍ୟକ୍ରମ ଆରମ୍ଭ କରିଛି। ଏକ ସ୍ବତନ୍ତ୍ର ମାଲବାହୀ ଟ୍ରେନ୍ ଖୋର୍ଦ୍ଧାରୋଡ଼ରୁ ପଲାସା ପର୍ଯ୍ୟନ୍ତ ଶୁକ୍ରବାର ଚଳାଚଳ କରିଥିଲା, ଯାହାକୁ ସ୍ବତନ୍ତ୍ର ମହିଳା ମାଲବାହୀ ଟ୍ରେନ୍ କୁହାଯାଉଛି। ଏହି ଟ୍ରେନ୍ରେ ସମସ୍ତ କର୍ମଚାରୀ ତଥା ଲୋକୋ ପାଇଲଟ(ଡ୍ରାଇଭର), ଆସିଷ୍ଟାଣ୍ଟ ଲୋକୋ ପାଇଲଟ, ଗାର୍ଡ ସମସ୍ତେ ମହିଳା ଥିଲେ। ବିନା ପୁରୁଷରେ କେବଳ ଏହି ମହିଳା କର୍ମଚାରୀଙ୍କ ଦ୍ୱାରା ୬ ତାରିଖରେ ଖୋର୍ଦ୍ଧାରୋଡ଼ରୁ ପଲାସା ଓ ୭ ତାରିଖରେ ପଲାସାରୁ ଖୋର୍ଦ୍ଧାରୋଡ଼ ପର୍ଯ୍ୟନ୍ତ ଟ୍ରେନ୍ ଚଳାଚଳ କରିଥିଲା। ଏହି ଟ୍ରେନ୍ର ଲୋକୋ ପାଇଲଟ୍ ଥିଲେ ମୁନି ଟିଗ୍ଗା, ଆସିଷ୍ଟାଣ୍ଟ ଲୋକୋ ପାଇଲଟ ରାଜେଶ୍ୱରୀ ବିଶ୍ୱାଳ ଏବଂ ରେବତୀ ସିଂ ଥିଲେ ଗାର୍ଡ। ଲୋକୋ ପାଇଲଟ ଓ ଗାର୍ଡ ପଦବୀରେ କାର୍ଯ୍ୟ କରୁଥିବା ମହିଳା ରନିଂଷ୍ଟାଫଙ୍କ ପାଇଁ ରେଲୱେ ପକ୍ଷରୁ ବିଭିନ୍ନ ଷ୍ଟେଶନରେ ମହିଳା ରନିଂରୁମ୍ ଯୋଗାଇ ଦିଆଯାଇଛି।
