ବଅଁରପାଳ, ୩ା୩(ଡି.ଏନ.ଏ.)
ଅନୁଗୋଳ ଜିଲାର ବଅଁରପାଳ ଭଳି ଜନଗହଳିପୂର୍ଣ୍ଣ ବଜାରରେ ବିଶ୍ରାମାଗାରଟିଏ ନ ଥିବାରୁ ବସ୍ ଧରିବାକୁ ଅପେକ୍ଷାରତ ଯାତ୍ରୀଙ୍କୁ ଏଠାରେ ଦୀର୍ଘ ସମୟ ଧରି ଠିଆ ହେବାକୁ ପଡ଼ୁଛି। ବିଶେଷକରି ଖରା ଓ ବର୍ଷା ଦିନେ ଯାତ୍ରୀମାନେ ଅଧିକ ହଇରାଣ ହେଉଛନ୍ତି। ବିଶ୍ରାମାଗାରଟିଏ ନିର୍ମାଣ ପାଇଁ ବାରମ୍ବାର ଦାବି ହେଉଥିଲେ ବି ପ୍ରଶାସନ ଏ ଦିଗରେ ଦୃଷ୍ଟି ହେଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ପ୍ରକାଶ ଯେ, ବଅଁରପାଳ ବଜାରସ୍ଥିତ ବସ୍ଷ୍ଟାଣ୍ଡରେ ପୂର୍ବରୁ ୩ଟି ଯାତ୍ରୀ ବିଶ୍ରାମାଗାର ଥିଲା। ହେଲେ ସେଗୁଡିକ ଭାଙ୍ଗିରୁଜି ଯାଇଥିଲେ ମଧ୍ୟ ପୁନଃ ନିର୍ମାଣ କରାଯାଉନାହିଁ। ଅନ୍ୟପକ୍ଷରେ କେତେଜଣ ଦୋକାନୀ ସେଠାରେ ଦୋକାନ ଖୋଲି ଜବରଦଖଲ କରିଥିବା ଅଭିଯୋଗ ହେଉଛି। ୫୫ ଓ ୧୪୯ ନଂ. ଜାତୀୟ ରାଜପଥ ଏହି ବଜାର ଦେଇଯାଇଥିବାରୁ କଟକ, ପୁରୀ, ଢେଙ୍କାନାଳ, ସମ୍ବଲପୁର, କେନ୍ଦୁଝର, ତାଳଚେର, ପାଲଲହଡ଼ା ସମେତ ବିଭିନ୍ନ ସ୍ଥାନକୁ ଯିବାଆସିବା ପାଇଁ ଲୋକେ ଏଠାରୁ ଗାଡ଼ି ଧରିଥାନ୍ତି। ବଅଁରପାଳ, ଗୋତମରା, ବନ୍ଦାସନ୍ତ୍ରୀ, ବୁଢାପଙ୍କ, ନୂଆହତା, ବଉଳିଗଡ, ତଳମୂଳ ସମେତ ଆଖପାଖ ଅଞ୍ଚଳର ଲୋକେ ଏହି ଷ୍ଟାଣ୍ଡ ଉପରେ ନିର୍ଭର କରନ୍ତି। ଦୀର୍ଘ ଦିନ ହେଲା ଏହି ଷ୍ଟାଣ୍ଡ ଅବହେଳିତ ଅବସ୍ଥାରେ ପଡିରହିଛି। ସେହିପରି ଏଠାରେ ପରିସ୍ରାଗାରଟିଏ ନ ଥିବାରୁ ଯାତ୍ରୀମାନେ ହଇରାଣ ହେଉଛନ୍ତି। ତେବେ ଯଥାଶୀଘ୍ର ବିଶ୍ରାମାଗାର ସହ ଷ୍ଟାଣ୍ଡର ଉନ୍ନତୀକରଣ ଦିଗରେ ଦୃଷ୍ଟି ଦିଆଯିବ ବୋଲି ବ୍ଲକ କର୍ତ୍ତୃପକ୍ଷ ପ୍ରକାଶ କରିଛନ୍ତି।
