ଏଥେନ୍ସ,୪ା୧(ଏଏଫ୍ପି)- ଗ୍ରୀକ ରେଫରିଙ୍କ ଘରେ ଶୁକ୍ରବାର ପୁଣି ଥରେ ଆକ୍ରମଣ ହୋଇଛି। ଦୁଇ ସପ୍ତାହ ମଧ୍ୟରେ ଏହା ଦ୍ୱିତୀୟ ଘଟଣା। ଏଣୁ ଫୁଟବଲ ମ୍ୟାଚ୍ ଅଫିସିଆଲଙ୍କ ବିକ୍ଷୋଭର ସମ୍ଭାବନା ସୃଷ୍ଟି ପାଇଛି। ଆକ୍ରମଣରେ ଘରର ପ୍ରବେଶ ଦ୍ୱାର ସମ୍ପୂର୍ଣ୍ଣ ଭାଙ୍ଗି ଯାଇଛି। ପୂର୍ବରୁ ଡିସେମ୍ବର ୨୨ ତାରିଖରେ ଆଞ୍ଜେଲୋ ଇଭାନଗେଲୁଙ୍କ ଘରେ ଆକ୍ରମଣ ହୋଇଥିଲା। ସେହିଦିନ ଭୋଲୋସ ଓ ଅଲିମ୍ପିଆକ୍ସ ମଧ୍ୟରେ ଅନୁଷ୍ଠିତ ମ୍ୟାଚ୍ ଗୋଲ ଶୂନ୍ୟ ଭାବେ ଶେଷ ହୋଇଥିଲା। ମ୍ୟାଚ୍ରେ ଅଲିମ୍ପିଆକ୍ସ ପକ୍ଷରୁ ଗୋଲ ଦିଆଯାଇଥିଲା। କିନ୍ତୁ ଭିଡିଓ ଆସିଟାଣ୍ଟ ଦାୟିତ୍ୱରେ ଥିବା ଆଞ୍ଜେଲୋ ଗୋଲ ପ୍ରତ୍ୟାଖ୍ୟାନ କରିଦେଇଥିଲେ। ଏହାପରେ ଏକ ପେନାଲ୍ଟି ଅପିଲକୁ ମଧ୍ୟ ଖାରଜ କରି ଦିଆଯାଇଥିଲା। ମ୍ୟାଚର ଫଳାଫଳ ଯୋଗୁ ଅଲିମ୍ପିଆକ୍ସ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନକୁ ଖସିଥିଲା। ମ୍ୟାଚ୍ ପରେ ୫ ଅଫିସିଆଲଙ୍କ ନାମରେ ଜାଣିଶୁଣି ପରିଚାଳନାରେ ତ୍ରୁଟି କରିଥିବା ଗ୍ରୀକ ଚାମ୍ପିୟନ ଅଭିଯୋଗ ଦାଖଲ କରିଥିଲେ। ଏପରି କି ସେମାନେ ୟୁଫା ଓ ଫିଫାର ଦୃଷ୍ଟି ଆକର୍ଷଣ କରିଥିଲେ। ପ୍ରଥମ ଆକ୍ରମଣ ପରେ ଲିଗ୍ ଅଫିସିଆଲ ଷ୍ଟ୍ରାଇକ କରିଥିଲେ। କିନ୍ତୁ ସଦ୍ୟ ଆକ୍ରମଣ ପରେ ଅଫିସିଆଲଙ୍କ ସହ ଯୋଗାଯୋଗ ହୋଇପାରି ନାହିଁ। ଅଲିମ୍ପିଆକସ ଏବେ ଟେବୁଲ ଶୀର୍ଷରେ ଥିବା ଥେସାଲୋନିକିଠାରୁ ୨ ପଏଣ୍ଟ ପଛରେ ରହିଛି। ଉକ୍ତ ଘଟଣାର ସରକାର ତଦନ୍ତ ଦାୟିତ୍ୱ ହାତକୁ ନେଇଛନ୍ତି।
