ସତରେ ଅଭିନୟ ନିଶା କେତେ ଗାଢ଼ ତାହା ଅନୁଭବୀ ହିଁ ଜାଣେ। ମେକ୍ଅପ୍ ନେଇ ମଞ୍ଚ ଉପରେ ପୁଣି ହଜାର ହଜାର ଦର୍ଶକଙ୍କ ସମ୍ମୁଖରେ ଜୀବନ୍ତ ଅଭିନୟ ସହଜ କଥା ନୁହେଁ। ହେଲେ ଏହାକୁ ଏକ ଚ୍ୟାଲେଞ୍ଜ ଭାବେ ନେଇ ଅପେରା ମଇଦାନକୁ ଓହ୍ଲାଇଛନ୍ତି ନବାଗତ ଅଭିନେତା ଆକାଶ ନାୟକ। ଗତବର୍ଷ ସାର୍ଥକ ଗଣନାଟ୍ୟରୁ ତାଙ୍କର ଆରମ୍ଭ ହୁଏ ଜଲିଉଡ୍ କ୍ୟାରିୟର। ଆଉ ଏବର୍ଷ ନବଗଠିତ ତଥା ହାଇବଜେଟ୍ ଅପେରା ପାର୍ଟି ‘ସୂର୍ଯ୍ୟମନ୍ଦିର’ରେ ନିଜକୁ ସାମିଲ କରିଛନ୍ତି ସେ। କେବଳ ସେତିକି ନୁହେଁ, ମିଳିଥିବା ଭୂମିକାରେ ସେ ଦର୍ଶକଙ୍କୁ ପ୍ରଭାବିତ କରି ସାଉଁଟି ଚାଲିଛନ୍ତି ସଫଳତା। ବାଲେଶ୍ୱର ଔପଦା ଅନ୍ତର୍ଗତ ସତ୍ୟପୁର ଗ୍ରାମରେ ଆକାଶଙ୍କ ଜନ୍ମ। ବିଜ୍ନେସ ମ୍ୟାନେଜମେଣ୍ଟରେ ଡିିଗ୍ରୀ ହାସଲ ପରେ ବମ୍ବେରେ ସେ ଚାକିରି କରନ୍ତି। ତା’ସହ କ୍ରାଇମ ପାଟ୍ରୋଲ ସିରିଏଲ୍ରେ କେତୋଟି ଏପିସୋଡ୍ରେ ତାଙ୍କୁ ଅଭିନୟ କରିବାର ସୁଯୋଗ ମିଳେ। ତା’ପରେ ସେ ଫେରିଆସନ୍ତି ଜନ୍ମସ୍ଥାନ ଓଡ଼ିଶାକୁ। ଓଡ଼ିଆ ଧାରାବାହିକ ‘ତୋ ପାଇଁ ମୁଁ, ଆମ ଘର ଲକ୍ଷ୍ମୀ ଏବଂ ହରର ଜୋନ୍’ରେ ଅଭିନୟ କରିବା ପରେ ତାଙ୍କୁ ସୁଯୋଗ ମିଳେ ଅପେରା ଜଗତରେ। ଚଳିତ ଯାତ୍ରା ସିଜନରେ ଅପେରା ସୂର୍ଯ୍ୟମନ୍ଦିର ପରିବେଷିତ ନାଟକ ‘କାହାଣୀ କହୁଛି ସୂର୍ଯ୍ୟମନ୍ଦିର’ରେ ଦୃଷ୍ଟିହୀନ ସାନ ଭାଇ ବିଜୁ, ‘ପୁଅ ଯିବ ଶାଶୁ ଘର’ରେ ହୁଣ୍ଡା ଭାଇ ଦୀପୁ ଏବଂ ‘ପ୍ରେମିକର ନଁ। ଚନ୍ଦ୍ରାଭାଗା’ରେ ଧର୍ମପଦ ଚରିତ୍ରରେ ତାଙ୍କୁ ଦେଖିବାକୁ ମିଳିଛି। ‘ଅପେରା ଜଗତରେ ପ୍ରବେଶ କରିବାକୁ ମୋର ସ୍ବପ୍ନ ଥିଲା। ଏହି ରାସ୍ତା ବେଶ୍ ଜଟିଳ ବୋଲି ଅନେକ କହିଥିଲେ। ହେଲେ ନିଜ ଉପରେ ଶତ ପ୍ରତିଶତ ବିଶ୍ୱାସ ରଖି ମୁଁ ଆସିଛି। ଅପେରା ସୂର୍ଯ୍ୟମନ୍ଦିରର ପରିଚାଳକ ବଙ୍କିମ ସ୍ବାଇଁ ମୋତେ ଯେଉଁ ସୁଯୋଗ ଦେଇଛନ୍ତି ସେଥିପାଇଁ ତାଙ୍କ ନିକଟରେ ମୁଁ ଚିରଋଣୀ ଏବଂ ତାଙ୍କୁ ପ୍ରଶଂସା କରିବାକୁ ମୋ ନିକଟରେ ଭାଷା ନାହିଁ। ଭୂମିକାଟି ଯେପରି ହେଉଥାଉ ନା କାହିଁକି ତାକୁ ମୁଁ ସବୁବେଳେ ବେଶ୍ ଗୁରୁତ୍ୱର ସହ ନେଇଥାଏ ବୋଲି କହନ୍ତି ଆକାଶ।
