ନୂଆଦିଲ୍ଲୀ,୧୭।୪ : ଚାଇନାର ସୁପର ଆପ୍ଲିକେଶନ ଓ୍ବିଚାର୍ଟକୁ ଟକ୍କରଦେବାକୁ ପ୍ରସ୍ତୁତି ଆରମ୍ଭ ହୋଇଛି। ଏଭଳି ନୂଆ ମଲ୍ଟିପରପସ ଆପ୍ ପ୍ରସ୍ତୁତି କରିବା ଲାଗି ଏବେ ମୁକେଶ ଅମ୍ବାନୀଙ୍କ ନେତୃତ୍ୱାଧୀନ ରିଲାଏନ୍ସ ଗ୍ରୁପ୍ ଏବଂ ମାର୍କ ଜୁକରବର୍ଗଙ୍କ ଫେସ୍ବୁକ୍ ଏକାଠି ହୋଇଛନ୍ତି। ହ୍ବାଟ୍ସଆପ୍ ପ୍ଲାଟ୍ଫର୍ମ ୟୁଜରବେସ୍ର ଫାଇଦା ଉଠାଇ ଓ୍ବାଚାର୍ଟକୁ ପଛରେ ପକାଇବା ଲାଗି ଏହି ଦୁଇ ଗ୍ରୁପ୍ ଏବେ ସମ୍ଭାବନା ସନ୍ଧାନରେ ରହିଥିବା ଏକ ଖବର ଗଣମାଧ୍ୟମରେ ପ୍ରକାଶ ପାଇଛି। ଏହି କାର୍ଯ୍ୟକ୍ରମ ଅଧୀନ ୨ କମ୍ପାନୀ ପ୍ରକଳ୍ପ ଲାଗି ପାଣ୍ଠି, ଟେକ୍ନିକାଲ ସହାୟତା ଏବଂ ଡୋମେନ କ୍ଷେତ୍ରରେ କାମ କରିବେ ବୋଲି ଜଣାପଡିଛି। ମିଡିଆ ରିପୋର୍ଟ ମୁତାବକ ଏଭଳି ଆପ୍ କାର୍ଯ୍ୟକାରୀ ହେଲେ ୟୁଜର ରିଲାଏନ୍ସ ରିଟେଲ ଷ୍ଟୋର ଏବଂ ଜିଓ ଡଟ୍ କମ୍ରେ କିରାନା ସାମଗ୍ରୀ କ୍ରୟ କରିବାକୁ ସକ୍ଷମ ହୋଇପାରିବେ। ଜିଓ ମନିର ବ୍ୟବହାର ଉପଯୋଗ ଗ୍ରାହକ ଏଥି ଲାଗି ପେମେଣ୍ଟ ମଧ୍ୟ କରିପାରିବେ। ନୂଆ ଆପ୍ଲିକେଶନରେ ଡିଜିଟାଲ ପେମେଣ୍ଟ, ସୋସିଆଲ ମିଡିଆ, ଗେମିଂ, ଏୟାର ଟିକେଟ ଏବଂ ହୋଟେଲ ବୁକିଂ ଭଳି ସୁବିଧା ମଧ୍ୟ ରହିବ। ଏଭଳି ଏକ ଆପ୍ଲିକେଶନ ରିଲାଏନ୍ସ ଇଣ୍ଡଷ୍ଟ୍ରିଜକୁ ସୁବିଧା ପ୍ରଦାନ କରିବ ବୋଲି ବିଶେଷଜ୍ଞ କହୁଛନ୍ତି। ନୂଆ ଯୋଜନାକୁ ରୂପରେଖ ପ୍ରଦାନ କରିବା ଲାଗି ମୋର୍ଗାନ ଷ୍ଟାନଲି ଇନ୍ଭେଷ୍ଟମେଣ୍ଟ ବ୍ୟାଙ୍କର ଭାବେ ନିଯୁକ୍ତ ହୋଇଛି। ଦୁଇ କମ୍ପାନୀର ନୂଆ ଯୋଜନା ଏକ ଷ୍ଟ୍ରାଟେଜିକ ପାର୍ଟନରଶିପ ହେବ, ଯାହା ଫେସ୍ବୁକ୍ ଏବଂ ରିଲାଏନ୍ସକୁ ଅଲଗା ଭାବେ ପରିଭାଷିତ ହେବ। ନୂଆ ଯୋଜନାର ଚୂଡ଼ାନ୍ତ ରୂପରେଖ ଏଯାଏ ସ୍ପଷ୍ଟ ହୋଇନାହିଁ।
