ବାରିପଦା ଅଫିସ,୨୭ା୮- ମୟୂରଭଞ୍ଜ ଜିଲା ସଦର ମହକୁମା ବାରିପଦା ସୀମାଠାରୁ ୫୦୦ ମିଟର ଦୂରରେ ଅବସ୍ଥିତ ଶାମାଖୁଣ୍ଟା ବ୍ଲକର ଚିପଟ ଅସ୍ତିଆ ଗ୍ରାମ ଜନସାଧାରଣ ଦୀର୍ଘ ବର୍ଷ ହେଲା ନାନା ଅସୁବିଧାରେ କାଳାତିପାତ କରୁଛନ୍ତି। ଜିଲା ପ୍ରଶାସନ କିମ୍ବା ସ୍ଥାନୀୟ ନିର୍ବାଚିତ ପ୍ରତିନିଧି କେହି ଏଥିପ୍ରତି ଗୁରୁତ୍ୱ ଦେଉନାହାନ୍ତି। ଏନେଇ ଦିବ୍ୟାଙ୍ଗ ମହାସଂଘ ଓ ଜାଗ ମୟୂରଭଞ୍ଜ ଜାଗ ସ୍ବେଚ୍ଛାସେବୀ ସଂସ୍ଥା ବିଭିନ୍ନ ସମୟରେ ଜିଲା ଓ ବ୍ଲକ ପ୍ରଶାସନକୁ ବିଭିନ୍ନ ସମୟରେ ଅବଗତ କରାଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଉ ନ ଥିବା ଅଭିଯୋଗ କରିଛନ୍ତି। ଏହାର ପ୍ରତିବାଦରେ ଦିବ୍ୟାଙ୍ଗ ମହାସଂଘର ଅରୁଣ କୁମାର ବେହେରା ଓ ଜାଗ ମୟୂରଭଞ୍ଜ ଜାଗର ସୋନାଲି ବେହେରାଙ୍କ ନେତୃତ୍ୱରେ ଏକ ସଚେତନତା ରାଲି ଓ ଚାରା ରୋପଣ କାର୍ଯ୍ୟକ୍ରମ ଚିପଟ ଅସ୍ତିଆଠାରେ ଆୟୋଜିତ ହୋଇଯାଇଛି। ରାଲିରେ ଶତାଧିକ ମହିଳା ସାମିଲ ହୋଇ ପରିମଳ ବ୍ୟବସ୍ଥା, ନିରକ୍ଷରତା ଦୂର, ବିଶୁଦ୍ଧ ପାଣି ଯୋଗାଣ, ଶୌଚାଳୟ ନିର୍ମାଣ, ଗ୍ରାମକୁ ପଲିଥିନ ମୁକ୍ତ କରିବା ଆଦି ବିଭିନ୍ନ ସମସ୍ୟାର ସମଧାନ ଦାବି କରିବା ସହିତ ଚିପଟ ଅସ୍ତିଆ ବିିଦ୍ୟାଳୟଠାରେ ବୃକ୍ଷରୋପଣ କରିଥିଲେ। ପରେ ଦିବ୍ୟାଙ୍ଗ ମହାସଂଘର ଅରୁଣ କୁମାର ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସୋନାଲି ପ୍ରିୟଦର୍ଶିନୀ ବେହେରା, ସବିତା ପଲେଇ, ଚୁମକି ବେହେରା, ବନିତା ଦେହୁରୀ, ସ୍ନେହଲତା ପ୍ରଧାନ, ରେଣୁ ନାଏକ, ଯମୁନା ଚୌଧୁରୀ, ମନୋରମା ଚୌଧୁରୀ, ପାର୍ବତୀ ନାଏକ, ପ୍ରୀତିସ୍ମିତା ସେଠୀ, ସୁମତି ନାଏକ, ନିନି ରଣାଙ୍କ ସମେତ ଅନ୍ୟମାନେ ଉପସ୍ଥିତ ରହି ଗ୍ରାମର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ। ତୁରନ୍ତ ସମସ୍ୟାର ସମାଧାନ ନ ହେଲେ ଗ୍ରାମବାସୀ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।
