ଢେଙ୍କାନାଳ ଅଫିସ, ୧୦।୫ – ଖୋର୍ଦ୍ଧାରୁ ସ୍ପିରିଟ୍ ନେବାକୁ ଆସି ଢେଙ୍କାନାଳ ଶକ୍ତିସୁଗାର କମ୍ପାନୀ ମୁଖ୍ୟଫାଟକ ସମ୍ମୁଖ ପାର୍କିଂ ଅଞ୍ଚଳରେ ଦେଢ଼ମାସ ହେଲା ରହିଥିବା ୩ ବିହାରୀ ଟ୍ୟାଙ୍କର ଚାଳକଙ୍କ ଅସ୍ବାଭାବିକ ମୃତ୍ୟୁ ପରେ କାରଖାନା କର୍ତ୍ତୃପକ୍ଷଙ୍କ ଚେତା ପଶିଛି। ଶନିବାର ଅପରାହ୍ନରେ କମ୍ପାନୀ ପକ୍ଷରୁ ୫୫ନଂ. ଜାତୀୟ ରାଜପଥକୁ ଲାଗିଥିବା ପାର୍କିଂ ଏରିଆରେ ଯାନବାହନ ପ୍ରବେଶ ନ କରିବା ଲାଗି ବାଉଁଶ ବାଡ ବନ୍ଧାଯାଇଛି। ଅନ୍ୟପଟେ ଲକ୍ଡାଉନ୍ ସମୟରେ ସ୍ପିରିଟ୍ ନେବା ପାଇଁ ଆସି ଟ୍ୟାଙ୍କରଗୁଡ଼ିକ କିପରି ପାର୍କିଂ ଅଞ୍ଚଳରେ ରହିଥିଲା ତାକୁ ନେଇ ଚର୍ଚ୍ଚା ଜୋର ଧରିଛି।
ଏ ସଂକ୍ରାନ୍ତରେ କମ୍ପାନୀର ଆଇନ ବିଭାଗ ଦାୟିତ୍ୱରେ ଥିବା ଅଧିକାରୀ ଅକ୍ଷୟ କୁମାର ଦାସ କୁହନ୍ତି, ଲକ୍ଡାଉନ୍ ସମୟରେ ଅଯଥାରେ ଗାଡିଗୁଡିକ ପାର୍କିଂ ଅଞ୍ଚଳରେ ଆସି ରହୁଛି। ଏହି ଘଟଣା ପରେ ପାର୍କିଂ ଏରିଆରେ ଯାନବାହନ ପ୍ରବେଶ ନ କରିବା ପାଇଁ ଅସ୍ଥାୟୀ ଭାବେ ବାଉଁଶ ବାଡ଼ ବନ୍ଧାଯାଇଛି। ଆଗାମୀ ଦିନରେ ଲୁହା ବାଡ଼ ଲଗାଯିବ ବୋଲି ସେ ସୂଚନା ଦେଇଛନ୍ତି।
ଅନ୍ୟପଟେ ମୃତ ଟ୍ୟାଙ୍କର ଚାଳକଙ୍କ ପରିବାର ସଦସ୍ୟ ଶନିବାର ଢେଙ୍କାନାଳରେ ପହଞ୍ଚତ୍ ଟାଉନ ଥାନା ପୋଲିସ, କମ୍ପାନୀ କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ମୃତକମାନେ ସମ୍ପର୍କରେ ୩ ଭାଇ ହୋଇଥିବାବେଳେ କଟକରେ ଚିକିତ୍ସାଧୀନ ଅବସ୍ଥାରେ ରୁବେଲ ଭାରତୀଙ୍କ ମୃତ୍ୟୁ ଘଟିଥିଲା। ତାଙ୍କର ଅନ୍ତିମ ସଂସ୍କାର କରିବାକୁ ପରିବାର ଲୋକେ କଟକ ଯାଇଥିବା ପୋଲିସ କହିଛି। ସେଠାରୁ ଫେରିବା ପରେ ରବିବାର ଜିଲା ଚିକିତ୍ସାଳୟ ଶବ ସଂରକ୍ଷଣ ଗୃହରେ ଥିବା ଦିଲୀପ ଭାରତୀ ଏବଂ ହରେରାମ ଭାରତୀଙ୍କ ମୃତଦେହ ହସ୍ତାନ୍ତର କରାଯିବ। ମୃତଦେହର ଶେଷକୃତ୍ୟ ଢେଙ୍କାନାଳରେ କରିବାକୁ ପରିବାର ଲୋକେ ଆଲୋଚନା କରୁଥିବା ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲ ସୂଚନା ଦେଇଛନ୍ତି। ଶବ ବ୍ୟବଚ୍ଛେଦର ପ୍ରାରମ୍ଭିକ ରିପୋର୍ଟ ଅନୁଯାୟୀ, ଫୁଡ୍ ପଏଜନିଂ ଯୋଗୁ ୩ଭାଇଙ୍କ ମୃତ୍ୟୁ ଘଟିଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି।
