କଟକ ଅଫିସ,୧୬ା୯ : ଦୁଇଟି ଚୋରି ଘଟଣାରେ ମଙ୍ଗଳାବାଗ ପୋଲିସ ରବିବାର ୪ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ଯୋବ୍ରା ଅଞ୍ଚଳର ଦେବବ୍ରତ ସାମଲ ଓରଫ ପିଣ୍ଟୁ, ପୁରୁଣା ତିଗିରିଆର କାହ୍ନୁ ଚରଣ ନାୟକ, କଲେଜ ଛକ ଅଞ୍ଚଳର ବିଶ୍ୱନାଥ ମୁଦୁଲିଆର ଓରଫ ଶିବ ଓ ପାଟ୍ରାସାହିର ସୀମାଞ୍ଚଳ ରାଓ। ସେମାନଙ୍କ ନିକଟରୁ ଗୋଟିଏ ଲୁହାରଡ, ଦୁଇଟି ବାଇକ୍, ୪ଟି ଏଟିଏମ୍ ଖୋଳ, କିଛି ଶାଢୀ ଓ ଜିନ୍ସପ୍ୟାଣ୍ଟ ଜବତ କରାଯାଇଛି। ଏହି ଘଟଣାରେ ଅନ୍ୟ ଜଣେ ଫେରାର ଥିବାବେଳେ ପୋଲିସ ତାଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି।
ପୋଲିସ ସୂତ୍ରରୁ ପ୍ରକାଶ, ଶଙ୍କରଲାଲ ମାହେଶ୍ୱରୀଙ୍କର କଲେଜ ଛକରେ ଏକ ଶାଢୀ ଶୋରୁମ୍ ରହିଛି। ଗତ ମେ’ ୪ ରାତିରେ ଦୁର୍ବୃତ୍ତମାନେ ତାଙ୍କ ଶୋ’ରୁମ୍ ତାଲା ଭାଙ୍ଗି ଲକ୍ଷାଧିକ ଟଙ୍କା ସହ ଦାମୀ ଶାଢି ଓ ଡ୍ରେସ୍ ଚୋରି କରିନେଇଥିଲେ। ଏହାର ପରଦିନ ସକାଳେ ଦୋକାନ ପାଖରେ ରହୁଥିବା ପଡୋଶୀଙ୍କଠାରୁ ଫୋନ୍କଲ ପାଇ ଶଙ୍କରଲାଲ ଘଟଣାସ୍ଥଳରେ ପହଞ୍ଚିଥିଲେ। ଦୁବୃର୍ତ୍ତମାନେ ଦୋକାନ ଡ୍ର ଭାଙ୍ଗି ସମସ୍ତ ଟଙ୍କା ଓ ଶାଢୀ ଚୋରି କରିଥିବା ଦେଖିବା ପରେ ମଙ୍ଗଳାବାଗ ଥାନାରେ ଅଭିଯୋଗ କରିଥିଲେ। ଏ ନେଇ ପୋଲିସ ଏକ ମାମଲା(ନଂ.୧୧୦/୧୯) ରୁଜୁ କରି ତଦନ୍ତ ଆରମ୍ଭ କରିଥିଲା। ରବିବାର ଗିରଫ ପରେ ପୋଲିସ ପଚରାଉଚରା କରିବାବେଳେ ଅନ୍ୟ ଏକ ବଡ ଘଟଣା ସାମ୍ନାକୁ ଆସିଥିଲା। ଜୁନ୍ ୨୮ରେ ମଙ୍ଗଳାବାଗ ଏସ୍ବିଆଇ ବ୍ୟାଙ୍କରେ ହୋଇଥିବା ଚୋରିରେ ସମ୍ପୃକ୍ତି ଥିବା ନେଇ ସେମାନେ ପୋଲିସ ନିକଟରେ ସ୍ବୀକାର କରିଥିଲେ। ବ୍ୟାଙ୍କର ଲକିଂ ସିଷ୍ଟମ ଭାଙ୍ଗି ଭିତରେ ସେମାନେ ପଶିଥିଲେ। ହେଲେ ବ୍ୟାଙ୍କ୍ରେ ଲାଗିଥିବା ଆଲାରାମ୍ ବାଜିବାରୁ ଟଙ୍କା ଚୋରି ନ କରିପାରି ସେମାନେ ପଳାଇ ଯାଇଥିଲେ। ଯିବା ସମୟରେ ବ୍ୟାଙ୍କର ଜରୁରି କାଗଜପତ୍ର, ଏଟିଏମ୍ ଖୋଳ, ଡାଏରି, କାଲ୍କୁଲେଟର ଓ ବ୍ୟାଙ୍କ ଲକର ଚାବି ନେଇଥିଲେ। ଏ ନେଇ ଏସ୍ବିଆଇ ଚିଫ୍ ମ୍ୟାନେଜର ଭବାନୀ ଶଙ୍କର ମହାନ୍ତିଙ୍କ ପକ୍ଷରୁ ମଙ୍ଗଳାବାଗ ଥାନାରେ ଅଭିଯୋଗ ହୋଇଥିଲା।
