ଓ୍ବାଶିଂଟନ୍: ମଣିଷ ଏବଂ ପଶୁପକ୍ଷୀଙ୍କ ମଧ୍ୟରେ ସମ୍ପର୍କ ଅତ୍ୟନ୍ତ ନିବିଡ଼। ଏହାର ଅନେକ ଉଦାହରଣ ମଧ୍ୟ ରହିଛି। ସେଥିମଧ୍ୟରୁ ଏକ ଉଦାହରଣ ଆମେରିକାରେ ଦେଖିବାକୁ ମିଳିଛି। ଏଠାକାର ଜଣେ ମହିଳା ଚୋରି ହୋଇଯାଇଥିବା ନିଜର ପୋଷା କୁକୁରକୁ ଖୋଜିବା ପାଇଁ ବିମାନରେ ଟିକେଟ୍ ବୁକ୍ କରିଛନ୍ତି। ମାତ୍ର ଏ ପର୍ଯ୍ୟନ୍ତ କୁକୁରର କୌଣସି ସନ୍ଧାନ ପାଇପାରିନାହାନ୍ତି। ତଥାପି ଖୋଜିବା ଜାରି ରଖିଛନ୍ତି। ଖାଲି ଏତିକି ନୁହେଁ, କୁକୁରକୁ କେହି ଖୋଜି ଆଣିଦେଲେ ୫ ଲକ୍ଷ ଟଙ୍କା ପୁରସ୍କାର ଦେବେ ବୋଲି ଘୋଷଣା ମଧ୍ୟ କରିସାରିଛନ୍ତି।
https://www.instagram.com/p/B3m2Gxlgi3B/?utm_source=ig_web_copy_link
ଏମିଲି ଟେଲେର୍ମୋ ନାମକ ଜଣେ ମହିଳାଙ୍କର ପୋଷାକୁକୁରକୁ କେହି ଚୋରି କରି ନେଇଯାଇଛି। ଏହାକୁ ଖୋଜିବା ପାଇଁ ସେ ସବୁକିଛି କରିବାକୁ ପ୍ରସ୍ତୁତ ଅଛନ୍ତି ବୋଲି କହିଛନ୍ତି। କାରଣ ସେ ତାଙ୍କ କୁକୁରକୁ ନିଜ ଜୀବନଠାରୁ ମଧ୍ୟ ବହୁତ ଭଲ ପାଆନ୍ତି। ଏମିଲିଙ୍କ ଅଷ୍ଟ୍ରେଲିଆନ୍ ଶେଫର୍ଡ ଜ୍ୟାକ୍ସନ୍ ୧୫ ଡିସେମ୍ବରରେ ଚୋରି ହୋଇଯାଇଛି। ସେ କହିଛନ୍ତି, ଯଦି କେହି ଖୋଜି ଆଣି ଦେବ ତେବେ ତାଙ୍କୁ ୭ ହଜାର ଡଲାର ଅର୍ଥାତ ଭାରତୀୟ ମୁଦ୍ରାରେ ୪.୯୭ ଲକ୍ଷ ଟଙ୍କା ପୁରସ୍କାର ମିଳିବ। କୁକୁରକୁ ଖୋଜିବା ପାଇଁ ଏକ ବିମାନରେ ୮୫ ହଜାର ଟଙ୍କାର ସେ ଟିକେଟ୍ ବୁକ୍ କରିଛନ୍ତି। ବିମାନରୁ ଫ୍ରାନ୍ସିସ୍କୋ ଏବଂ ଓକ୍ଲ୍ୟାଣ୍ଡ୍ର ପ୍ରତି ଗଳିକନ୍ଦି ନଜର କରୁଛନ୍ତି। ବିମାନରେ କୁକୁରଙ୍କୁ ଖୋଜିବା ପାଇଁ ଏକ ବ୍ୟାନର ବି ଲଗାଇଛନ୍ତି। ଯେଉଁଥିରେ ଓ୍ବେବ୍ସାଇଟ୍ www.bringjacksonhome.comରେ ସୂଚନା ଦେବାକୁ କୁହାଯାଇଛି। ଏମିଲି କହିଛନ୍ତି, ସିସିଟିଭି ଫୁଟେଜରୁ ଦେଖିବାକୁ ମିଳିଛି ଜଣେ ବ୍ୟକ୍ତି କୁକୁର ନିକଟକୁ ଯାଉଛନ୍ତି। ବ୍ୟକ୍ତିଜଣକ ମୁଖା ପିନ୍ଧିଥିବାରୁ ଚିହ୍ନି ହେଉନାହାନ୍ତି। ଏମିଲିି ତାଙ୍କର କୁକୁର ଖୋଜିବା ପାଇଁ ସବୁଆଡୁ ପ୍ରୟାସ ଜାରି ରଖିଛନ୍ତି ମାତ୍ର ଏ ପର୍ଯ୍ୟନ୍ତ କୌଣସି ସନ୍ଧାନ ପାଇପାରିନାହାନ୍ତି।
