ଛତ୍ରପୁର, ୨୩।୫(ଡି.ଏନ୍.ଏ.)- ଗଞ୍ଜାମ ଜିଲାରେ କରୋନା ଯୋଦ୍ଧାଙ୍କୁ ଅସମ୍ମାନ ଏବଂ ଦୁର୍ବ୍ୟବହାର କରାଯାଉଥିବା ଅଭିଯୋଗ ବଢ଼ିବାରେ ଲାଗିଛି। ଡାକ୍ତର, ଆଶାକର୍ମୀ, ଶିକ୍ଷକ, ମହିଳା ସଂଘ ସଦସ୍ୟ ଏପରିକି ପୋଲିସ କର୍ମଚାରୀଙ୍କ ଉପରେ ଆକ୍ରମଣ ହେଉଥିବା ନଜିରକୁ ଆସୁଛି। ଏବେ ଓଏଏସ୍ ଅଫିସରଙ୍କ ଉପରେ ଆକ୍ରମଣ ହେବାରେ ଲାଗିଛି। ଛତ୍ରପୁର ବିଡ଼ିଓଙ୍କ ଉପରେ ଆକ୍ରମଣ ଘଟଣାକୁ ନେଇ ଅସନ୍ତୋଷ ଥମି ନ ଥିବା ବେଳେ ଜିଲାର ପାତ୍ରପୁର ତହସିଲଦାର ଶ୍ରୀନିବାସ ବେହେରାଙ୍କ ଉପରେ ଆକ୍ରମଣ ହୋଇଥିବା ଅଭିଯୋଗ ହୋଇଛି।
ତହସିଲଦାର ୨୧ ତାରିଖରେ ଗୋଠ ଗାଁ ଅଞ୍ଚଳର ଏକ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନରେ ଯିବା ସମୟରେ ଚିକିଟି ଅଞ୍ଚଳର ନୂଆମିଶାଣପୁରର ଏକ ସଙ୍ଗରୋଧ କେନ୍ଦ୍ରର ୧୦୦ ମିଟର ପରିଧି ମଧ୍ୟରେ ୫୦ ଉର୍ଦ୍ଧ୍ୱ ବ୍ୟକ୍ତି ସମାଜିକ ଦୂରତ୍ୱ ନ ରଖି ବୁଲୁଥିବା ଦେଖିବାକୁ ପାଇଥିଲେ। ଏହାକୁ ତହସିଲଦାର ବାରଣ କରିଥିଲେ। ଏପରିକି ସେଠାରେ କ୍ରିକେଟ ଖେଳୁଥିବା କିଛି ଯୁବକଙ୍କୁ ଆଇନ ଉଲଘଂନ ହେଉଥିବା ଏବଂ ଏଠାରେ ୧୪୪ ଧାରା ଲାଗୁ ରହିଛି ବୋଲି ସେ କହିଥିଲେ। ହେଲେ ସେହି ଯୁବକମାନେ ତାଙ୍କୁ ଦୁର୍ବ୍ୟବହାର କରିବା ସହ କ୍ରିକେଟ ଷ୍ଟମ୍ପରେ ଆକ୍ରମଣ କରିଥିଲେ। ଏପରିକି କେତେକ ବାଇକଧରି ତହସିଲଦାରଙ୍କ ଚାରିପଟେ ବୁଲିଥିଲେ। ଏନେଇ ସେ ୨୨ ତାରିଖ ରେ କେ ନୁଆଁଗାଁ ଥାନାରେ ଏତଲା ଦେଇଥିଲେ ଏବଂ ଏହାକୁ ଭିତି କରି ଏକ ମାମଲା (୧୮୮/୨୦) ରୁଜୁ ହୋଇଛି। ଗଞ୍ଜାମ ଜିଲା ଓଏଏସ୍ ସଙ୍ଘ ତରଫରୁ ଛତ୍ରପୁର ସର୍କିଟ ହାଉସରେ ଶନିବାର ସଂଘ ସଭାପତି ତଥା ଏଡ଼ିଏମ୍ କବିନ୍ଦ୍ର କୁମାର ସାହୁଙ୍କ ଅଧ୍ୟକ୍ଷତାରେ ଏକ ବୈଠକ କରାଯାଇ ଏହାକୁ ନିନ୍ଦା କରଯାଇଥିଲା। ପରେ ଗଞ୍ଜାମ ଜିଲାପାଳ ଏବଂ ବ୍ରହ୍ମପୁର ଏସ୍ପିଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା। ବର୍ତମାନ ସୁଦ୍ଧା ଏଥିରେ ସମ୍ପୃକ୍ତଙ୍କୁ ପୋଲିସ ଗିରଫ କରିପାରିନାହିଁ। ଅପରପକ୍ଷେ ଅଭିଯୁକ୍ତଙ୍କ ଉପରେ ଏନ୍ଏସ୍ଏ ଲଗାଇବାକୁ ସଂଘ ଦାବି କରିଛି। ୨୪ ଘଣ୍ଟା ମଧ୍ୟରେ ସମ୍ପୃକ୍ତଙ୍କୁ ଗିରଫ କରିବାକୁ ଦାବି ହୋଇଛି। ଏସମ୍ପର୍କରେ ସରକାର ଓ ରାଜ୍ୟ ସଂଘକୁ ଜଣାଇବୁ ବୋଲି ଜିଲା ସଂଘ ସଭାପତି କହିଛନ୍ତି।
