ଛେଣ୍ଡିପଦା,୧୯ା୭ (ସ୍ବ.ପ୍ର./ଡି.ଏନ.ଏ.)-ଅନୁଗୋଳ ଜିଲା ଛେଣ୍ଡିପଦା ବନାଞ୍ଚଳ ସନ୍ତରାବନ୍ଧ ଗ୍ରାମରେ ବୁଧବାର ବିଳମ୍ବିତ ରାତିରେ ୩ଟି ହାତୀ ଉପଦ୍ରବ କରିବା ସହ ସ୍ଥାନୀୟ ମହର୍ଷି ମହାବିଦ୍ୟାଳୟ ପାଚେରି ଭାଙ୍ଗି ଦେଇଛନ୍ତି। ଏଥିସହ ଅନ୍ୟ ଏକ କୋଠରି ମଧ୍ୟ କ୍ଷତିଗ୍ରସ୍ତ ହୋଇଛି। ସେହି ସମୟରେ କଲେଜର ରାତ୍ର ଜଗୁଆଳ ସୌଭାଗ୍ୟବଶତଃ ହାତୀ ଆକ୍ରମଣରୁ ବର୍ତ୍ତି ଯାଇଛନ୍ତି। ହାତୀ ପାଚେରି ଭାଙ୍ଗିବା ଶବ୍ଦ ଶୁଣି ଜଗୁଆଳି ମଦନ ସାହୁ ଉଠି ବାହାରକୁ ଆସିବା ପରେ ହାତୀ ସହ ମୁହାଁମୁହିଁ ହୋଇଥିଲେ। ସେଠାରୁ ଜୀବନ ବିକଳରେ ଗ୍ରାମ ମଧ୍ୟକୁ ଦୌଡି ଆସିବାରେ ସକ୍ଷମ ହୋଇଥିଲେ। ଗ୍ରାମବାସୀ ସେଠାରେ ପହଞ୍ଚି ହାତୀ ଘଉଡାଇଥିଲେ। ପ୍ରାୟ ୧ ଲକ୍ଷରୁ ଊର୍ଦ୍ଧ୍ୱ ଟଙ୍କାରେ ଏହି ପାଚେରି ନିର୍ମାଣ କରାଯାଇଥିଲା ବୋଲି କଲେଜ ଅଧ୍ୟକ୍ଷ ପଞ୍ଚୁନାଥ ପ୍ରଧାନ ପ୍ରକାଶ କରିଛନ୍ତି। ସ୍ଥାନୀୟ ଫରେଷ୍ଟ ରେଞ୍ଜ ଅଫିସରଙ୍କୁ ମହାବିଦ୍ୟାଳୟ ପକ୍ଷରୁ ଅବଗତ କରାଯାଇଛି। ତୁରନ୍ତ ବନବିଭାଗ ମହାବିଦ୍ୟାଳୟର କ୍ଷୟକ୍ଷତି ଆକଳନ କରି କ୍ଷତିପୂରଣ ଯୋଗାଇଦେବା ନିମନ୍ତେ ଗ୍ରାମବାସୀ ଦାବି କରିଛନ୍ତି।
