ନୂଆଦିଲ୍ଲୀ,୫।୫(ପି.ଟି.): ଚଳିତବର୍ଷ ଜାତୀୟ କ୍ରୀଡ଼ା ପୁରସ୍କାର ପାଇଁ ନାମାଙ୍କନ ଆମନ୍ତ୍ରଣ କରିଛି କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ। ତେବେ କରୋନା ଭାଇରସ ସଂକ୍ରମଣ କାରଣରୁ ଚାଲିଥିବା ଲକ୍ଡାଇନ କାରଣରୁ ଆଶାୟୀ ପ୍ରାର୍ଥୀମାନେ ଇ-ମେଲ ମାଧ୍ୟମରେ ଆବେଦନ କରିପାରିବେ ବୋଲି କ୍ରୀଡ଼ା ମନ୍ତ୍ରଣାଳୟ ତରଫରୁ କୁହାଯାଇଛି। ରାଜୀବ ଗାନ୍ଧୀ ଖେଳ ରତ୍ନ ପୁରସ୍କାର ସମେତ ବିଭିନ୍ନ ବର୍ଗର ପୁରସ୍କାର ପାଇଁ ଆବେଦନ ଆହ୍ବାନ କରାଯାଇଛି।
ଏହି ଆବେଦନ ପ୍ରକିୟା ଏପ୍ରିଲ୍ରେ ଆରମ୍ଭ ହୋଇଥାଏ। ତେବେ ଲକ୍ଡାଉନ୍ କାରଣରୁ ଏହାକୁ ମେ ମାସକୁ ଘୁଞ୍ଚାଇ ଦିଆଯାଇଥିଲା। ମେ ୧୭ ତାରିଖରେ ଲକ୍ଡାଉନ୍ ଶେଷ ହେବ। ଲକ୍ଡାଉନ କାରଣୁ ନାମାଙ୍କନର ହାର୍ଡ କପି ଆବଶ୍ୟକ ନାହିଁ। ପ୍ରର୍ଥୀ ଓ ସୁପାରିଶକରିବାକୁ ଥିବା କର୍ତ୍ତୃପକ୍ଷଙ୍କ ଦ୍ୱାରା ସ୍ବାକ୍ଷର ହୋଇଥିବା ସ୍କାନ କପି ଅନ୍ତିମ ତାରିଖରୁ ପୂର୍ବରୁ ଦାଖଲ କରିବାକୁ ମନ୍ତ୍ରଣାଳୟ ତରଫରୁ କୁହାଯାଇଛି। ଜୁନ୍ ୩କୁ ଅନ୍ତିମ ତାରିଖ ଧାର୍ଯ୍ୟ କରାଯାଇଛି। ଅନ୍ତିମ ତାରିଖ ପରେ ଦାଖଲ ହୋଇଥିବା ଆବେଦନ ପତ୍ରକୁ ବିଚାରକୁ ନିଆଯିବ ନାହିଁ।
ବିଭିନ୍ନ ବର୍ଗରେ ଜାତୀୟ କ୍ରୀଡ଼ା ପୁରସ୍କାର ପ୍ରଦାନ କରାଯାଇଥାଏ। ଆଥଲେଟ୍ମାନେ ଅର୍ଜୁନ ପୁରସ୍କାର, ଖେଳ ରତ୍ନ ପୁରସ୍କାର ପାଇଁ ଯୋଗ୍ୟ ବିବେଚିତ ହୋଇଥାନ୍ତି। ସେହିପରି ପ୍ରଶିକ୍ଷଣ ଉତ୍କୃଷ୍ଟତା ଦେଖାଇଥିବା କୋଚ୍ମାନଙ୍କୁ ଦ୍ରୋଣାଚାର୍ଯ୍ୟ ପୁରସ୍କାର ପ୍ରଦାନ କରାଯାଇଥାଏ। ସେହିପରି ଜୀବନବ୍ୟାପୀ ଅବଦାନ ପାଇଁ ଧ୍ୟାନଚାନ୍ଦ ପୁରସ୍କାର ପ୍ରଦାନ କରାଯାଇଥାଏ।
ଏଥର ୨୦୧୬ ଜାନୁୟାରୀରୁ ୨୦୧୯ ଡିସେମ୍ବର ମଧ୍ୟରେ ପ୍ରଦର୍ଶନକୁ ଦୃଷ୍ଟିରେ ରଖି ଅଜୁର୍ନ ଓ ଖେଳରତ୍ନ ପୁରସ୍କାର ପ୍ରଦାନ କରାଯିବ। ଡୋପ୍ ଅଭିଯୁକ୍ତ ଖେଳାଳିମାନେ ଆବେଦନ କରିପାରିବେ ନାହିଁ ବୋଲି କୁହାଯାଇଛି। ଖେଳରତ୍ନ ପାଇଁ ୭.୫ ଲକ୍ଷ ଟଙ୍କା ଓ ଅଜୁର୍ନ ପୁରସ୍କାର ପାଇଁ ୫ ଲକ୍ଷ ଟଙ୍କା ପୁରସ୍କାର ପ୍ରଦାନ କରାଯିବ। ଗତବର୍ଷ ପାରା ଅଲିମ୍ପିୟାନ ଦୀପା ମଲିକ୍ ଓ ତାରକା ରେସଲର ବଜରଙ୍ଗ ପୁନିଆଙ୍କୁ ଖେଳ ରତ୍ନ ପୁରସ୍କାର ପ୍ରଦାନ କରାଯାଇଥିଲା।
