ନୟାଗଡ଼ ଅଫିସ,୫ା୧୦: ନୟାଗଡ଼ ଜିଲାପାଳଙ୍କ କାର୍ଯ୍ୟାଳୟର ୨ୟ ମହଲା ସାଧାରଣ ଓ ବିବିଧ ଉପବିଭାଗ (ଜେନେରାଲ ଆଣ୍ଡ ମିସ୍ ସେକ୍ସନ)ରେ ଶୁକ୍ରବାର ଭୋର ସମୟରେ ଅଗ୍ନିକାଣ୍ଡ ଘଟିଛି। ଏଥିରେ କାର୍ଯ୍ୟାଳୟର ଗୋଟିଏ କମ୍ପ୍ୟୁଟର ଓ ପ୍ରିଣ୍ଟର ପୋଡ଼ି ନଷ୍ଟ ହୋଇଯାଇଥିବା ବେଳେ ଫାଇଲଗୁଡ଼ିକ ସୁରକ୍ଷିତ ରହିଛି। ଶର୍ଟ ସର୍କିଟରୁ ଏହି ଅଗ୍ନିକାଣ୍ଡ ଘଟିଛି।
ଭୋର ୫ଟା ସମୟରେ ଉକ୍ତ କୋଠରିରେ ବିସ୍ଫୋରଣ ହେବା ଭଳି ଶବ୍ଦ ହୋଇଥିଲା। କାର୍ଯ୍ୟାଳୟରେ ଥିବା ରାତ୍ର ଜଗୁଆଳି କାଳନ୍ଦୀ ଚରଣ ବେହେରା ଯାଇ ଦେଖିବା ବେଳକୁ ଚାରିଆଡ଼େ ଧୂଆଁମୟ ହୋଇଥିବା ବେଳେ ଏକ କୋଠରିରୁ ନିଆଁ ବାହାରୁଥିଲା। ସଙ୍ଗେ ସଙ୍ଗେ ସେ ଫୋନ୍ କରିବାରୁ ନୟାଗଡ଼ ଦମକଳ ବାହିନୀ ଘଟଣାସ୍ଥଳରେ ପହଞ୍ଚତ୍ ନିଆଁକୁ ଆୟତ୍ତ କରିଥିଲେ। ଶର୍ଟ ସର୍କିଟରୁ ଏହି ଅଗ୍ନିକାଣ୍ଡ ଘଟିଥିବା ବେଳେ କୌଣସି ଫାଇଲ୍ ପୋଡ଼ି ନ ଥିବା ଅତିରିକ୍ତ ଜିଲାପାଳ ବିଧାନ ଚନ୍ଦ୍ର ରାୟ ପ୍ରକାଶ କରିଛନ୍ତି। ଏହି ଦୁର୍ଘଟଣା ପରେ ଜିଲାପାଳଙ୍କ କାର୍ଯ୍ୟାଳୟର ସୁରକ୍ଷା ନେଇ ପ୍ରଶ୍ନ ଉଠିଛି। ମିଳିଥିବା ସୂଚନା ଅନୁଯାୟୀ ୩ ମହଲା କାର୍ଯ୍ୟାଳୟର କୌଣସି ବି ସ୍ଥାନରେ ଅଗ୍ନି ନିର୍ବାପନ ଯନ୍ତ୍ର ନାହିଁ। ଜିଲା ପ୍ରଶାସନ ଏଥିପ୍ରତି ଧ୍ୟାନଦେବା ପାଇଁ ସାଧାରଣରେ ଦାବି ହେଉଛି।
