କେନ୍ଦୁଝର, ୨୪ା୭(ଡି.ଏନ.ଏ./ସ୍ବ.ପ୍ର.)-ବିଭିନ୍ନ ସମସ୍ୟା ନେଇ ପଦ୍ମଶ୍ରୀ ଦୈତାରୀ ନାଏକ ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି। ପଦ୍ମଶ୍ରୀ ନାଏକଙ୍କୁ ଗେଟ୍ ପାସ ମିଳିନଥିବାରୁ କଟକ ଓ ଭୁବନେଶ୍ୱରକୁ ଯାତ୍ରା କରୁଥିବା ସମୟରେ ବିଭିନ୍ନ ଟୋଲଗେଟରେ ଅଯଥା ହଇରାଣ ହେଉଥିବା ଦାବିପତ୍ରରେ ଉଲ୍ଲେଖ କରିଛନ୍ତି। ଏହାବ୍ୟତୀତ ତାଙ୍କର ପରିଚୟ ପତ୍ର ନଥିବାରୁ ସେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି ବୋଲି ଦର୍ଶାଇଛନ୍ତି। ଅପରପକ୍ଷେ ସେ ୧୦ଟି ଗାଁର କେତେକ ଦାବି ମଧ୍ୟ ଉପସ୍ଥାପନ କରିଛନ୍ତି। ବାଂଶପାଳ ବ୍ଲକର ବାରାଗଡ ଓ ଗୋନାସିକା ପଞ୍ଚାୟତକୁ ଆମ୍ବୁଲାନ୍ସ ସେବା ଯୋଗାଇବା ସହ ତଳବୈତରଣୀ ଗ୍ରାମର ସୀତାରାମ ଛକ ନିକଟରେ ଏକ ଯାତ୍ରୀନିବାସ ନିର୍ମାଣ କରିବା, ତଳବୈତରଣୀ ଗ୍ରାମର ନୂତନ ପିଚୁ ରାସ୍ତା ଓ ପୋଲ ନିର୍ମାଣ ସହିତ ଷ୍ଟ୍ରିଟ ଲାଇଟ୍ ବ୍ୟବସ୍ଥା କରିବା। ଏତଦ୍ବ୍ୟତୀତ ଗୋନାସିକା ପଞ୍ଚାୟତ, ବାରାଗଡ ପଞ୍ଚାୟତ, ଜୁଙ୍ଗା ପଞ୍ଚାୟତ ଓ ବକ୍ସିବାରିଗଁା ପଞ୍ଚାୟତ ଅଞ୍ଚଳକୁ ନେଇ ତଳବୈତରଣୀଠାରେ ଏକ ବିଜ୍ଞାନ କଲେଜ ଖୋଲିବାକୁ ମଧ୍ୟ ଦାବିପତ୍ରରେ ଉଲ୍ଲେଖ କରିଛନ୍ତି। କେଉଁଠି ପାନୀୟଜଳ ନାହିଁ ଆଉ କେଉଁଠି ମୋବାଇଲ ଟାଓ୍ବାର ନାହିଁ। ଅପରପକ୍ଷେ ତଳବୈତରଣୀ ଗ୍ରାମରେ ଏକ ନୂତନ ଅଙ୍ଗନୱାଡି କେନ୍ଦ୍ର ନିର୍ମାଣ ସହ ପଶୁଡାକ୍ତରଖାନା ସ୍ଥାପନ ନିମନ୍ତେ ସେ ଲିଖିତ ଭାବେ ଜିଲା ପ୍ରଶାସନକୁ ଜଣାଇଛନ୍ତି। କେନ୍ଦୁଝରଠାରୁ ବାରାଗଡ ପର୍ଯ୍ୟନ୍ତ ଯାତ୍ରୀବାହୀ ବସ ଚଳାଚଳ ପାଇଁ ଅନୁରୋଧ କରିଛନ୍ତି। ତଳବୈତରଣୀ ସୀତାରାମ ଛକଠାରୁ ଖୁଣ୍ଟବନ୍ଧ ଗ୍ରାମ ପର୍ଯ୍ୟନ୍ତ ଏକ ନୂତନ ପ୍ରଧାନମନ୍ତ୍ରୀ ସଡକ ନିର୍ମାଣ କରିବାକୁ ଦାବିପତ୍ରରେ ଦର୍ଶାଇଛନ୍ତି।
