ଫୁଲବାଣୀ ଅଫିସ, ୨୨ା୨-କନ୍ଧମାଳ ଜିଲା ବିଜେଡି ସଭାପତିଙ୍କୁ ନେଇ କିଛିଦିନ ଧରି ଚାଲିଥିଲା ଚର୍ଚ୍ଚାର ଅନ୍ତ ଘଟିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁଣି ସରୋଜ କର୍ଣ୍ଣଙ୍କ ଉପରେ ଆସ୍ଥା ପ୍ରକଟ କରି ତାଙ୍କୁ ପୁନର୍ବାର କନ୍ଧମାଳ ଜିଲା ସଭାପତି ଭାବେ ଚୟନ କରିଛନ୍ତି। ଚଳିତ ଥରକୁ ମିଶାଇ ସେ କ୍ରମାଗତ ଭାବେ ୩ ଥର ଜିଲା ସଭାପତି ହେବାର ଗୌରବ ଅର୍ଜନ କରିବାସହ ହ୍ୟାଟ୍ରିକ କରିଛନ୍ତି। ଏନେଇ ତାଙ୍କ ସମର୍ଥଙ୍କ ଏବଂ ବିଜେଡି କାର୍ଯ୍ୟକର୍ତ୍ତାଙ୍କ ମଧ୍ୟରେ ଆନନ୍ଦର ଲହରୀ ଖେଳି ଯାଇଛି। ଫୁଲବାଣୀ ସହର ହନୁମାନ ମନ୍ଦିର ପାଖରେ ଥିବା ତାଙ୍କ ଅଫିସକୁ ବହୁ ସଂଖ୍ୟାରେ କର୍ମୀ ଆସି ଅଭିନନ୍ଦନ ଜଣାଇଛନ୍ତି।
୨୦୧୩ରୁ ୨୦୧୬, ୨୦୧୬ରୁ ୨୦୨୦ ଯାଏ ସରୋଜ ଜିଲା ବିଜେଡି ସଭାପତି ଥିଲେ। ଏବେ ପୁଣି ସେ ଦାୟିତ୍ୱରେ ରହିଲେ। ଏଥି ପୂର୍ବରୁ ସେ ୧୯୯୭ରେ ଫୁଲବାଣୀ ସମବାୟ ଗୃହ ନିର୍ମାଣ ସଭାପତି, ୧୯୯୧ରୁ ୨୦୦୩ ଯାଏ ଛାତ୍ର ସଭାପତି(ଜନତା ଦଳ ଏବଂ ବିଜେଡି), ୨୦୦୭ରୁ ୨୦୧୩ ଯୁବ ସଭାପତି ଦାୟିତ୍ୱ ତୁଲାଇ ଥିବାବେଳେ ଏବେ ସେ ଜିଲା ସଭାପତି ସମେତ ରାଜ୍ୟ ସମବାୟ ଗୃହ ନିର୍ମାଣ ଅଧ୍ୟକ୍ଷ ଦାୟିତ୍ୱ ତୁଲାଉଥିଲେ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁଣି ମୋ ଉପରେ ବିଶ୍ୱାସ କରି ମୋତେ ଏହି ଦାୟିତ୍ୱ ଦେଇଥିବାରୁ ତାଙ୍କୁ କୃତଜ୍ଞତା ଜଣାଉଛି। ମୋ ସମୟରେ ଆମେ ମିଳିତ ହୋଇ ଜି.ଉଦୟଗିରି ଏବଂ ବାଲିଗୁଡା ବିଜ୍ଞାପିତ ଅଞ୍ଚଳ ପରିଷଦ(ଏନ୍ଏସି) ଦଖଲ କରିଥିଲୁ। କେବେ ବି ଜିଲା ପରିଷଦ ଗଠନ ହୋଇ ନ ଥିଲା। ଗତ ନିର୍ବାଚନରେ ଏହା ଦଖଲ କରିଛୁ। ସେହିପରି ସାଧାରଣ ନିର୍ବାଚନରେ ସମସ୍ତ ବିଧାୟକ ଏବଂ ଏମ୍ପି ସିଟ୍ ଆମ ଦଖଲରେ ରହିଛି। ଆଗକୁ ପୌର ପରିଷଦ ନିର୍ବାଚନ ହେବ। ତାହାକୁ ମଧ୍ୟ ନିଜ ଅକ୍ତିଆରକୁ ଆଣିବୁ ବୋଲି ପ୍ରକାଶ କରିଛନ୍ତି।
