ରାଞ୍ଚି: କରୋନା ଏବେ ଲୋକଙ୍କ ମନରେ ଏଭଳି ଭୟ ପୂରାଇ ଦେଇଛି ଯେ, ସାଧାରଣ ଜ୍ୱର ରୋଗୀଙ୍କୁ ବି ଦେଖିଲେ ଭୟରେ ଛୁଇଁବାକୁ ଇଚ୍ଛା କରୁନାହାନ୍ତି ଲୋକେ। ଏମିତି ଏକ ଦୁଃଖଦାୟକ ଘଟଣା ଦେଖିବାକୁ ମିଳିଛି ଝାଡ଼ଖଣ୍ଡର ରାଞ୍ଚିରେ। ଏହି ଅଞ୍ଚଳର କଟକାୟା ବଗିଚା ଟୋଲି ନିବାସୀ ୨୧ ବର୍ଷୀୟ ଯୁବକଙ୍କୁ ପ୍ରବଳ ଜ୍ୱର ହେବା ସହ ପେଟ ଯନ୍ତ୍ରଣା ହେଉଥିଲା। ତେଣୁ ସେ ରାୟଡିହରେ ଥିବା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଯିବା ପାଇଁ ଆମ୍ବୁଲାନ୍ସକୁ ଫୋନ୍ କରି ଡକାଇଥିଲେ। କିନ୍ତୁ ଯୁବକଙ୍କ ଅବସ୍ଥା ଦେଖି ଆମ୍ବୁଲାନ୍ସର ଡ୍ରାଇଭର ସମ୍ପୃକ୍ତ ଯୁବକଙ୍କୁ କରୋନା ହୋଇଥିବା ସନ୍ଦେହ କରିଥିଲେ। ଏହାପରେ ତାଙ୍କ ପରିବାର ଲୋକଙ୍କଠାରୁ ଜାଣିଥିଲେ କି, ଯୁବକଜଣକ ଦିଲ୍ଲୀରୁ ଫେରିଛନ୍ତି। ଏକଥା ଶୁଣିବା ମାତ୍ରେ ଡ୍ରାଇଭରଜଣକ କରୋନା ସନ୍ଦେହ କରି ତୁରନ୍ତ ଫେରି ଯାଇଥିଲେ। ଏହାପରେ ପୁଣି କେତେ ଘଣ୍ଟା ପରେ ଯୁବକ ପୁଣି ଥରେ ଏକ ଆମ୍ବୁଲାନ୍ସ ଡକାଇ ହସ୍ପିଟାଲ୍ ଆସିଥିଲେ। ମାତ୍ର ଅବସ୍ଥା ଗମ୍ଭୀର ଥିବାରୁ ତାଙ୍କର ମୃତ୍ୟୁ ହୋଇଥିଲା। କିନ୍ତୁ ମୃତ୍ୟୁ ପରେ ବି ଯୁବକଙ୍କୁ କରୋନା ହୋଇଥିବା ସନ୍ଦେହ କରି କେହି ତାଙ୍କ ମୃତଦେହକୁ ଛୁଇଁବାକୁ ପ୍ରସ୍ତୁତ ହୋଇନଥିଲେ। କରୋନା ଭାଇରସ୍ ଯୋଗୁ ଲୋକମାନେ ଏବେ ଏଭଳି ଆତଙ୍କ ମଧ୍ୟରେ ଜୀବନ ବିତାଉଛନ୍ତି।
