ବଇଣ୍ଡା,୪ା୫(ଡି.ଏନ.ଏ.): ମଙ୍ଗଳବାର ରାତିରେ ହୋଇଥାନ୍ତା ଝିଅ ବାହାଘର। ଏଥିପାଇଁ ଘରେ ସରିଥିଲା ସମସ୍ତ ପ୍ରସ୍ତୁତି। ହେଲେ ବଧୂ ବେଶରେ ଝିଅକୁ ଶାଶୁଘରକୁ ବିଦା କରିବା ପୂର୍ବରୁ ସକାଳୁ ଟ୍ରେନ୍ ଆଗକୁ ଡେଇଁ ଜୀବନ ହାରିଦେଲେ ବାପା। ଅନୁଗୋଳ ଜିଲା କିଶୋରନଗର ବ୍ଲକ ଊରୁକୁଳା ପଞ୍ଚାୟତ ପରସୁମାଳ ଗ୍ରାମରେ ଘଟିଥିବା ଏପରି ଦୁଃଖଦ ଘଟଣା ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ପରସୁମାଳ ଗ୍ରାମର ବ୍ୟବସାୟୀ ସୁରଥ ବେହେରା (୫୨)ଙ୍କ ଝିଅ ବାହାଘର ମଙ୍ଗଳବାର ସ୍ଥିର ହୋଇଥିଲା। ଧୁମ୍ଧାମରେ ବାହାଘର ଆୟୋଜନ ହୋଇଥିବା ବେଳେ ଘରେ ବନ୍ଧୁବାନ୍ଧବ ପହଞ୍ଚି ସାରିଥିଲେ। ଝିଅକୁ ସମସ୍ତ ଘର କରଣା ସାମଗ୍ରୀ ଦେବାକୁ କିଣାକିଣି ସରିଥିଲା। ଏଥିପାଇଁ ସୁରଥ ଲକ୍ଷାଧିକ ଟଙ୍କା କରଜ କରିଥିଲେ। ଏହାକୁ ନେଇ ସୋମବାର ରାତିରେ ପରିବାର ମଧ୍ୟରେ କଳହ ଲାଗିଥିଲା। ଫଳରେ ମାନସିକ ଭାରସାମ୍ୟ ହରାଇଥିବା ସୁରଥ ମଙ୍ଗଳବାର ସକାଳେ ତାଳଚେର-ସମ୍ବଲପୁର ରେଳପଥର ହଣ୍ଡପା ଥାନା ଖାଲପାଳ ନିକଟରେ ସମ୍ବଲପୁର-ପୁରୀ ଇଣ୍ଟରସିଟି ଏକ୍ସପ୍ରେସ ଆଗକୁ ଡେଇଁ ଆତ୍ମହତ୍ୟା କରିଥିଲେ। ତାଙ୍କ ମୃତଦେହ ରେଳ ଧାରଣାରେ ପଡିଥିବା ଦେଖି ଅଞ୍ଚଳବାସୀ ବଇଣ୍ଡା ରେଳ ଫାଣ୍ଡି ପୋଲିସକୁ ସୂଚନା ଦେଇଥିଲେ। ଖବରପାଇ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ତାଳଚେର ମେଡିକାଲକୁ ପଠାଇ ଦେଇଛି। ଏହି ଘଟଣାକୁ ନେଇ ଗ୍ରାମରେ ଶୋକର ଛାୟା ଖେଳିଯାଇଥିବା ବେଳେ ସୁରଥଙ୍କ ଝିଅ ବାହାଘର ହୋଇପାରି ନାହିଁ।
