ଟୋକିଓ,୧୪।୪(ଏପି): କୋଭିଡ୍-୧୯ ମହାମାରୀ ପାଇଁ ଆଉଥରେ ଅଲିମ୍ପିକ୍ସକୁ ଘୁଞ୍ଚାଇବାକୁ କୌଣସ ଯୋଜନା ବା ପ୍ଲାନ- ବି ନାହିଁ ବୋଲି ଟୋକିଓ ଆୟୋଜକମାନେ କହିଛନ୍ତି। ଟୋକିଓ ଅଲିମ୍ପିକ୍ସ ମୁଖପାତ୍ର ମାସା ଟାକାୟା ଏ ନେଇ ସୂଚନା ଦେଇଛନ୍ତି। ପ୍ରଥମେ ଅଲିମ୍ପିକ୍ସ ୨୦୨୦ ଜୁଲାଇ ୨୪ରୁ ଅଗଷ୍ଟ ୯ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ କୋଭିଡ୍-୧୯ ମହାମାରୀ କାରଣରୁ ଏହାକୁ ଏବେ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି। ପୁନଃ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଏହି ମେଗା ଇଭେଣ୍ଟ ୨୦୨୧ ଜୁଲାଇ ୨୩ରୁ ଆରମ୍ଭ ହୋଇ ଅଗଷ୍ଟ ୮ ତାରିଖରେ ଶେଷ ହେବାର କାର୍ଯ୍ୟକ୍ରମ ରହିଛି।
ସେହିପରି ପାରା ଅଲିମ୍ପିକ୍ସ ୨୦୨୧ ଅଗଷ୍ଟ ୨୪ରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଓ ଆୟୋଜକ ଦେଶ ଜାପାନ ମିଳିତ ଭାବେ ଅଲିମ୍ପିକ୍ସକୁ ଘୁଞ୍ଚାଇବାକୁ ନିଷ୍ପତ୍ତି ନେଇଥିଲେ। ଏବେ ନୂଆ କାର୍ଯ୍ୟସୂଚୀ ଅନୁଯାୟୀ କାର୍ଯ୍ୟକରିବା ଲକ୍ଷ୍ୟରେ ଆମେ ରହିଛୁ ଓ ଆମ ପାଖରେ କୌଣସି ଦ୍ୱିତୀୟ ଯୋଜନା ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଯଦି ଏହି ଭାଇରସର ଆତଙ୍କ ବଜାୟ ରହେ ତାହାଲେ ପୁଣି ଅଲିମ୍ପିକକୁ ଘୁଞ୍ଚାଯିବ କି ବୋଲି ପ୍ରଶ୍ନର ଉତ୍ତର ଦେଇ ସେ ଏହି କଥା କହିଛନ୍ତି।
ଆସନ୍ତାବର୍ଷ ଅଲିମ୍ପିକ୍ସ ଆୟୋଜନ ନେଇ ସମସ୍ତେ ଚେଷ୍ଟିତ ଅଛନ୍ତି ବୋଲି ଆଇଓସି ଅଧ୍ୟକ୍ଷ ଥୋମାସ ବାକ୍ ମଧ୍ୟ କହିଛନ୍ତି। ପୁଣି ଥରେ ଅଲିମ୍ପିକ୍ ଘୁଞ୍ଚାଇବା ଯୋଜନାକୁ ଜାପାନ ପ୍ରଧାନମନ୍ତ୍ରୀ ଶିଞ୍ଜୋ ଆବେ ମଧ୍ୟ ଅସ୍ବୀକାର କରିଛନ୍ତି। ଉଲ୍ଲେଖଥାଉ କି, ଅଲିମ୍ପିକ୍ସରେ ୧୧,୦୦୦ ଓ ପାରା ଅଲିମ୍ପିକ୍ସରେ ୪, ୪୦୦ ଆଥ୍ଲେଟ ଅଂଶଗ୍ରହଣ କରିବେ। ୨୦୬ଟି ଦେଶରୁ ବହୁ ସଂଖ୍ୟାରେ ସପୋର୍ଟ ଷ୍ଟାଫ୍ ମଧ୍ୟ ଏଥିପାଇଁ ଟୋକିଓ ଆସିବେ। ଅଲିମ୍ପିକ୍ସ ଆୟୋଜନ କରିବାକୁ ୧୨.୬ ବିଲିୟନ ଆମେରିକୀୟ ଡଲାର ଖର୍ଚ୍ଚ କରାଯିବ ବୋଲି ଟୋକିଓ ଆୟୋଜକମାନେ କହିଛନ୍ତି। ତେବେ ଜାପାନ ସରକାରଙ୍କ ଅଡିଟ୍ ଏହାର ଦୁଇଗୁଣା ଖର୍ଚ୍ଚ ହେବ ବୋଲି ସ୍ପଷ୍ଟ କରିଥିଲା। ଏଥିମଧ୍ୟରୁ ୫.୬ ବିଲିୟନ ଡଲାର ପ୍ରାଇଭେଟ ମନି ଓ ବାକି ଜାପାନ ସରକାର ବହନ କରିବେ ବୋଲି କୁହାଯାଇଛି।
