ପ୍ୟାରିସ, ୩|୬ (ଏପି)- କରୋନା ଭାଇରସ୍ ଯୋଗୁ ସ୍ଥଗିତ ରହିଥିବା ଫର୍ମୁଲା ଓ୍ବାନ୍ ରେସ୍ ପୁଣି ଆରମ୍ଭ ହେବାକୁ ଯାଉଛି। ଜୁଲାଇ ମାସରେ ପଛକୁ ପଛ ୮ଟି ରେସ୍ ଅନୁଷ୍ଠିତ ହେବ। ଜୁଲାଇ ୫ରେ ରେଡ୍ବୁଲ୍ ରିଙ୍ଗ୍ରେ ଅଷ୍ଟ୍ରିଆ ଗ୍ରାଁ ପ୍ରି ସହ ୨୦୨୦ ପାଇଁ ନୂତନ ଭାବେ ପ୍ରସ୍ତୁତ କରାଯାଇଥିବା କ୍ୟାଲେଣ୍ଡର ଆରମ୍ଭ ହେବ। ଠିକ୍ ସପ୍ତାହକ ପରେ ଅର୍ଥାତ ଜୁଲାଇ ୧୨ରେ ଦ୍ୱିତୀୟ ରେସ୍ ସମାନ ଟ୍ରାକ୍ରେ ହେବ। ଫେଡେରେଶନ ଅଫ୍ ଇଣ୍ଟରନ୍ୟାଶନାଲ ଅଟୋମୋବାଇଲ୍ (ଏଫ୍ଆଇଏ) ପକ୍ଷରୁ ମଙ୍ଗଳବାର ଏକ ବିବୃତିିରେ ଏହି ସୂଚନା ଦିଆଯାଇଛି। ପରବର୍ତ୍ତୀ ରେସ୍ ବ୍ରିଟିଶ ଗ୍ରାଁପ୍ରି ସିଲଭରଷ୍ଟୋନ୍ଠାରେ କ୍ରମାଗତ ଅଗଷ୍ଟ ୨ ଓ ୯ରେ ହେବ। ବ୍ରିଟିଶ ସରକାର ଏଲିଟ୍ ସ୍ପୋଟର୍ସ ପାଇଁ ବିଦେଶାଗତଙ୍କ ଲାଗି କ୍ୱାରାଣ୍ଟାଇନ୍ରୁ ମୁକ୍ତ ରଖାଯାଇଛିି। ନୂଆ କ୍ୟାଲେଣ୍ଡର ଅନୁସାରେ ୟୁରୋପ ପର୍ଯ୍ୟାୟରେ ପରବର୍ତ୍ତୀ ରେସ୍ଗୁଡ଼ିକ ଯଥାକ୍ରମେ ସ୍ପେନ (ଅଗଷ୍ଟ ୧୬), ବେଲଜିୟମ (ଅଗଷ୍ଟ ୩୦) ଏବଂ ଇଟାଲୀ (ସେପ୍ଟେମ୍ବର ୯)ରେ ଅନୁଷ୍ଠିତ ହେବ। ଫର୍ମୁଲା ଓ୍ବାନ ରେସ୍ର ପୁନଃ ଆୟୋଜନ ପାଇଁ ଗତ ଦୁଇମାସ ହେବ ଏଫ୍ଆଇଏ, ସମସ୍ତ ପାର୍ଟନର, କର୍ତ୍ତୃପକ୍ଷ ଏବଂ ୧୦ଟି ଟିମ୍ ମଧ୍ୟରେ ଏକ ସଂଶୋଧିତ କ୍ୟାଲେଣ୍ଡର ପ୍ରସ୍ତୁତି ନେଇ ଆଲୋଚନା ଜାରି ରହିଥିଲା। କୋଭିଡ୍-୧୯କୁ ନେଇ ବର୍ତ୍ତମାନ ସମଗ୍ର ବିଶ୍ୱରେ ଯେଉଁ ପରିସ୍ଥିତି ସୃଷ୍ଟି ହୋଇଛି ସିଜନର ପରବର୍ତ୍ତୀ ରେସ୍ଗୁଡ଼ିକ ସମ୍ପର୍କରେ କୌଣସି ନିଷ୍ପତ୍ତି ନିଆଯାଇ ପାରି ନାହିଁ। ବର୍ତ୍ତମାନ ହେବାକୁ ଥିବା ରେସ୍ଗୁଡ଼ିକରେ ଦର୍ଶକ ଉପସ୍ଥିତ ରହିବେ ନାହିଁ। ବର୍ଷର ଶେଷ ପର୍ଯ୍ୟାୟରେ କରୋନା ପରିସ୍ଥିତିରେ ଯଦି ଉନ୍ନତି ପରିଲକ୍ଷିତ ହୁଏ ତେବେ ଦର୍ଶକଙ୍କ କଥା ବିଚାର କରାଯାଇ ପାରେ। ମହାମାରୀ ଯୋଗୁ ଏହି ସିଜନରେ ୪ଟି ରେସ୍ ବାତିଲ ହୋଇସାରିଛି। ସେଗୁଡ଼ିକ ହେଲା ସିଜନ ଆରମ୍ଭ ଅଷ୍ଟ୍ରେଲିଆନ୍ ଗ୍ରାଁ ପ୍ରି, ମୋନାକୋ ଗ୍ରାଁ ପ୍ରି, ଫ୍ରେଞ୍ଚ୍ ଗ୍ରାଁ ପ୍ରି ଏବଂ ନେଦରଲାଣ୍ଡ୍ସ ଗ୍ରାଁ ପ୍ରି।
