ଭୁବନେଶ୍ୱର,୨୯।୧୧(ବ୍ୟୁରୋ): ସ୍ଥାନୀୟ ଆଇଆର୍ସି ଭିଲେଜ୍ ହାଇସ୍କୁଲ ପଛପଟେ ଥିବା ଏକ ଡଷ୍ଟବିନରୁ ଶୁକ୍ରବାର ନରକଙ୍କାଳ ଉଦ୍ଧାର କରାଯାଇଛି। ଜଣେ ସଫେଇ କର୍ମଚାରୀ ସକାଳେ ଡଷ୍ଟବିନ୍ ସଫା କରୁଥିବା ବେଳେ ପଲିଥିନରେ ବନ୍ଧା ଅବସ୍ଥାରେ କଙ୍କାଳ ଦେଖିବାକୁ ପାଇଥିଲେ। ଖବର ପାଇ ନୟାପଲ୍ଲୀ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲା। ପରେ ଫରେନ୍ସିକ୍ ଟିମ୍ ଘଟଣାସ୍ଥଳରେ ପହଞ୍ଚି କଙ୍କାଳର ନମୂନା ସଂଗ୍ରହ କରି ପରୀକ୍ଷା ପାଇଁ ପଠାଇଛନ୍ତି। ତେବେ ଏହି କଙ୍କାଳରେ ଏଲ୍-୧, ଏଲ୍-୨ ଭଳି ମାର୍କିଂ ଥିବାରୁ କୌଣସି ମେଡିକାଲ କଲେଜରେ ପାଠପଢ଼ା ପାଇଁ ରଖାଯାଇଥିବା ଏବଂ କେହି ଏହାକୁ କେହି ଆଣି ଫିଙ୍ଗି ଦେଇଥିବା ଅନୁମାନ କରାଯାଉଛି। ଅପରପକ୍ଷେ ଉକ୍ତ ଅଞ୍ଚଳରେ କଙ୍କାଳ ମିଳିବା ପରେ ଲୋକମାନେ ଆତଙ୍କିତ ହୋଇପଡ଼ିଛନ୍ତି। ସେହିଭଳି କଙ୍କାଳଟି କେତେ ଦିନର ଏବଂ ଏଗୁଡିକ ପୁରୁଷ ଅଥବା ମହିଳାଙ୍କର ତାହା ପରୀକ୍ଷଣ ପରେ ଜଣାପଡ଼ିବ ବୋଲି ପୋଲିସ କହିଛି।
