ପୁରୀ ଅଫିସ,୧୯ା୭ : ଘୋଷଯାତ୍ରା ସାରି ଚତୁର୍ଦ୍ଧାବିଗ୍ରହ ରତ୍ନସିଂହାସନରେ ବିରାଜମାନ କରିଛନ୍ତି। ହେଲେ ତିନିରଥ ଏବେ ସିଂହଦ୍ୱାର ସମ୍ମୁଖରେ ଦଣ୍ଡାୟମାନ। ଗୁରୁବାର ରଥରୁ କନା ଖୋଲା ଆରମ୍ଭ ହୋଇଛି। କୋଠସୁଅଁାସିଆ ସେବକମାନେ ବଡ଼ଠାକୁର ବଳଭଦ୍ରଙ୍କ ତାଳଧ୍ୱଜ ରଥରୁ କନା ଖୋଲି ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର କରିଛନ୍ତି। ଶ୍ରୀମନ୍ଦିର ତତ୍ତ୍ବାବଧାରକ ସୁଦର୍ଶନ ମେକାପଙ୍କ ହେପାଜତରେ ଏହା ରଖାଯାଇଛି। ରଥକନା ଖୋଲା ସମୟରେ ବାହାରିଥିବା ଛୋଟ କନାକୁ ନେବା ପାଇଁ ଭକ୍ତଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଥିଲା।
ଶ୍ରୀମନ୍ଦିର ତତ୍ତ୍ବାବଧାରକ କହିଛନ୍ତି, ଗୁରୁବାର ତିନିରଥରୁ କନା ଖୋଲାଯିବାକୁ ସ୍ଥିର ହୋଇଥିଲା। ତେବେ ବର୍ଷା ଯୋଗୁ କେବଳ ତାଳଧ୍ୱଜ ରଥରୁ କନା ଖୋଲାଯାଇଛି। ଶୁକ୍ରବାର ଅନ୍ୟ ଦୁଇ ରଥରୁ କନା ଖୋଲାଯିବ। ବର୍ଷସାରା ଠାକୁରଙ୍କ ଯାନିଯାତ୍ରାରେ ଏହି କନା ବ୍ୟବହାର କରାଯାଏ। ଏଥିସହ ବିଭିନ୍ନ ବେଶ, ଝୁଲଣ, ଷୋଳପୂଜା ଆଦିରେ ମଧ୍ୟ ବ୍ୟବହୃତ ହୁଏ। ଶ୍ରୀମନ୍ଦିର ପ୍ରଶାସନ ପକ୍ଷରୁ ଶ୍ରୀକ୍ଷେତ୍ରର ବିଭିନ୍ନ ଶକ୍ତିପୀଠକୁ ଷୋଳପୂଜା ଦିନ ପ୍ରଦାନ କରାଯାଉଥିବା ଚାନ୍ଦୁଆ ମଧ୍ୟ ଏଥିରେ ତିଆରି କରାଯାଇଥାଏ। ସୂଚନାଥାଉ କି, ଗତ ମଙ୍ଗଳବାର ତିନିରଥରୁ ସାରଥୀ, ଘୋଡ଼ା, ସଖୀ, ପାର୍ଶ୍ୱ ଦେବଦେବୀ, ହଂସପଟା, କନ୍ୟାପଟା, ଚାରମାଳ ଓ ଠେକରାବାଡ଼କୁ ଭୋଇ ସେବକମାନେ ଖୋଲିଥିଲେ। ଶ୍ରୀମନ୍ଦିର ପ୍ରଶାସନଠାରୁ ନିର୍ଦ୍ଦେଶ ପାଇବା ପରେ ଭୋଇ ସେବକମାନେ ରଥ ଭାଙ୍ଗିବା କାମ ଆରମ୍ଭ କରିବେ ବୋଲି ଜଣାପଡ଼ିଛି।
