ବରଗଡ଼ ଅଫିସ୍,୧୭।୪-ଅନ୍ଧବିଶ୍ୱାସ, ସାମାଜିକ କୁସଂସ୍କାର ଏବେ ମଧ୍ୟ ଦୂରୀଭୁତ ହୋଇ ପାରିନାହିଁ। ପରିବାରର ଜଣେ କୁଷ୍ଠ ରୋଗାକ୍ରାନ୍ତ ବୋଲି ବରଗଡ଼ ସହର ଉପକଣ୍ଠ ବରଡ଼ୋଲ ଗ୍ରାମର ଜଣେ ମହିଳାଙ୍କ ଶବଦାହ ପାଇଁ ସମ୍ପର୍କୀୟ କିମ୍ବା ସାହି ପଡ଼ିଶା ଲୋକ ବାହାରିଲେ ନାହିଁ। ଶେଷରେ ଶୁକ୍ରବାର ବରଗଡ଼ର ଏକ ସାମାଜିକ ଅନୁଷ୍ଠାନ ନିଷ୍ଠା ପରିବାରର ସ୍ବେଚ୍ଛାସେବୀମାନେ ସମ୍ପୃକ୍ତ ଅସହାୟ ମହିଳାଙ୍କ ଶବଦାହ କରିଛନ୍ତି। ମୃତା ଜଣକ ଉକ୍ତ ଗ୍ରାମର ମିଥିଲା ସାହୁ(୪୮)। ତାଙ୍କର ଜଣେ ବଡ଼ଭାଇ ବ୍ୟତୀତ ପରିବାରରେ ଆଉ କେହି ନାହାନ୍ତି। ମୃତା ରୋଗାକ୍ରାନ୍ତ ଥିଲେ। ଶୁକ୍ରବାର ତାଙ୍କ ଦେହାନ୍ତ ହୋଇଥିଲା। ତେବେ ମହିଳାଙ୍କ ଜଣେ ସମ୍ପର୍କୀୟ କୁଷ୍ଠ ରୋଗାକ୍ରାନ୍ତ ଥିବାଯୋଗୁ ଶବ ସଂସ୍କାର ପାଇଁ କେହି ସମ୍ପର୍କୀୟ କିମ୍ବର ସାହି ପଡ଼ିଶା ଲୋକ ଆସି ନଥିଲେ। ପୋଲିସଠାରୁ ସୂଚନା ପାଇ ନିଷ୍ଠା ପରିବାରର ସ୍ବେଚ୍ଛାସେବୀମାନେ ପହଞ୍ଚି ଚାରିକାନ୍ଧ ଦେବା ସହିତ ସ୍ଥାନୀୟ ଜୀରାନଦୀ କୂଳ ସ୍ବର୍ଗଦ୍ୱାରକୁ ମୃତଦେହ ନେଇ ସେଠାରେ ସଂସ୍କାର କରିଥିଲେ। ନିଷ୍ଠା ପରିବାରର ସଭାପତି ରକ୍ଷପାଳ ସାହୁ, ସମ୍ପାଦକ ଅଶ୍ୱିନୀ ତ୍ରିପାଠୀ, ସମ୍ପାଦକ ଅଶ୍ୱିନୀ ତ୍ରିପାଠୀ, କୋଷାଧ୍ୟକ୍ଷ ଶ୍ୟାମସୁନ୍ଦର ସାହୁ, ରୋହିତ ସାହୁ, କ୍ଷୀରୋଦ୍ର ସାହୁ, ଲିଙ୍ଗରାଜ ସାହୁ, ଜୟନ୍ତ ପ୍ରଧାନ ପ୍ରମୁଖ ଏଥିରେ ସକ୍ରିୟ ଅଂଶଗ୍ରହଣ କରିଥିଲେ ।
