ଜୋହାନ୍ସବର୍ଗ, ୧୩।୧୨- ଦକ୍ଷିଣ ଆଫ୍ରିକୀୟ ଅନ୍ତର୍ଜାତୀୟ ଡିଫେଣ୍ଡର ମୋଟ୍ଜେକ ମଦିଶା ରବିବାର ଜୋହାନ୍ସବର୍ଗରେ ହୋଇଥିବା ଏକ କାର୍ ଦୁର୍ଘଟଣାରେ ପ୍ରାଣ ହରାଇଛନ୍ତି। ଏ ନେଇ ରବିବାର ସ୍ପଷ୍ଟ କରିଛି ଦକ୍ଷିଣ ଆଫ୍ରିକା ଫୁଟବଲ ଆସୋସିଏଶନ (ଏସ୍ଏଏଫ୍ଏ)। ଦୁର୍ଘଟଣା ବେଳେ ୨୫ ବର୍ଷୀୟ ମଦିଶା ଓ ଅନ୍ୟ ଜଣେ ବ୍ୟକ୍ତି କାରରେ ଥିଲେ। ଦ୍ରୁତଗତିରେ ଆସୁଥିବା କାରଟି ନିୟନ୍ତ୍ରଣ ହରାଇ ବିଜ୍ଞାପନ ବୋର୍ଡରେ ବାଡ଼େଇ ହୋଇଥିଲା। ଫଳରେ କାର୍ରେ ଲାଗିଯାଇଥିଲା ନିଆଁ। ଏଥିରେ କାରରେ ଥିବା ଦୁଇ ଜଣଙ୍କ ମୃତ୍ୟୁ ହୋଇଥିବା ମାମେଲୋଡି ସନଡାଉନ କ୍ଲବର ଜଣେ ଅଫିସିଆଲ କହିଛନ୍ତି।
ଗତ ଦୁଇ ମାସ ମଧ୍ୟରେ କାର୍ ଦୁର୍ଘଟଣାରେ ପ୍ରାଣ ହରାଇବାରେ ମଦିଶା ସନଡାଉନ କ୍ଲବର ଦ୍ୱିତୀୟ ଖେଳାଳି। ତାଙ୍କ ପୂର୍ବରୁ ଆନେଲେ ଏନ୍କନଗ୍କା ଡର୍ବାନର ପୂର୍ବାଞ୍ଚଳରେ ଘଟିଥିବା ଦୁର୍ଘଟଣାରେ ପ୍ରାଣ ହରାଇଥିଲେ।
ଅର୍ନ୍ତଜାତୀୟ ସ୍ତରରେ ୧୩ ମ୍ୟାଚ୍ ଖେଳିଥିବା ମଦିଶା ସେଣ୍ଟର ବ୍ୟାକ୍ ପୋଜିଶନ ପାଇଁ ଦକ୍ଷିଣ ଆଫ୍ରିକା ଦଳର ପ୍ରଥମ ପସନ୍ଦ ଥିଲେ। ତାଙ୍କ ପ୍ରତିନିଧିତ୍ୱରେ ଦକ୍ଷିଣ ଆଫ୍ରିକା ୨୦୧୬ ସିଏଏଫ୍ ଚାମ୍ପିୟନ୍ସ ଲିଗ୍ ଜିତିଥିବାବେଳେ ଥରେ ସେମିଫାଇନାଲିଷ୍ଟ ହୋଇଥିଲା।
