ଜଗନ୍ନାଥପ୍ରସାଦ, ୨୬।୧୨(ଡି.ଏନ୍.ଏ.): ଗଞ୍ଜାମ ଜିଲା ଜଗନ୍ନାଥପ୍ରସାଦ ଥାନା ଅଞ୍ଚଳରେ ଥିବା କୃଷି ଫାର୍ମ ସମ୍ମୁଖରେ ବୁଧବାର ରାତିରେ ଏକ ଦୁର୍ଘଟଣା ଘଟିଛି। ଅଜଣା ଗାଡ଼ି ଧକ୍କାରେ ଲୁନାରେ ଯାଉଥିବା ମା’ଙ୍କ ମୃତ୍ୟୁ ଘଟିଥିବା ବେଳେ ଶିଶୁକନ୍ୟା ଆହତ ହୋଇଛନ୍ତି। ମୃତ ମହିଳା ହେଲେ କାଦୁଆ ଡାଳଖାଇ ଋଷି ନାଇକଙ୍କ ସ୍ତ୍ରୀ ଝୁନୁ କୁମାରୀ ନାଇକ(୨୩)। ଗୁରୁବାର ମୃତଦେହ ବ୍ୟବଚ୍ଛେଦ ପାଇଁ ଭଞ୍ଜନଗର ମେଡିକାଲକୁ ପଠାଇ ଦିଆଯାଇଛି। ସେହିଭଳି ଶିଶୁକନ୍ୟାଙ୍କ ଚିକିତ୍ସା ଜାରି ରହିଥିବା ସୂଚନା ମିଳିଛି। ଏନେଇ ଲୁନା ଚାଳକ ସନ୍ତୋଷ ସେଠୀ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପ୍ରକାରେ ମାମଲା(ନଂ-୨୨୧/୧୯) ଦଫା ୨୭୧/୩୩୭/୩୩୮ ରୁଜୁ କରି ପୋଲିସ ତଦନ୍ତ କରୁଛି।
ସନ୍ତୋଷଙ୍କ ଅଭିଯୋଗ ପ୍ରକାରେ, ସେ ନିଜ ଦୋକାନ ବନ୍ଦ କରି ଘରକୁ ଫେରୁଥିବା ସମୟରେ ଝୁନୁ ଶିଶୁକନ୍ୟାଙ୍କୁ ଧରି ପହଞ୍ଚିଥିଲେ। ପରେ ତାଙ୍କୁ ଛାମୁଣ୍ଡା ଗ୍ରାମରେ ପହଞ୍ଚାଇ ଦେବାକୁ ଅନୁରୋଧ କରିଥିଲେ। ସନ୍ତୋଷ ନିଜ ଲୁନାରେ ସେମାନଙ୍କୁ ବସାଇ ନରେନ୍ଦ୍ରପୁର ଗ୍ରାମରୁ ଛାମୁଣ୍ଡା ଯାଉଥିବା ବାଟରେ ଉକ୍ତ ଫାର୍ମ ନିକଟରେ ଏକ ଅଜଣା ଗାଡ଼ି ଧକ୍କା ଦେଇ ପଳାଇଥିଲା। ପୋଲିସର ପାଟ୍ରୋଲିଂ ଗାଡ଼ି ଆହତ ଅବସ୍ଥାରେ ୩ଜଣଙ୍କୁ ଉଦ୍ଧାର କରି ସ୍ଥାନୀୟ ମେଡିକାଲରେ ଭର୍ତ୍ତି କରିଥିଲେ। ହେଲେ ଝୁନୁଙ୍କ ମୁଣ୍ଡରେ ଆଘାତ ଲାଗିଥିବାରୁ ତାଙ୍କର ମୃତ୍ୟୁ ଘଟିଥିଲା। ସେହିଭଳି କୁନି ଝିଅର ଗୋଡ଼ ଭାଙ୍ଗିଥିବାରୁ ତାକୁ ଭଞ୍ଜନଗର ମେଡିକାଲକୁ ସ୍ଥାନାନ୍ତର କରାଯାଇଛି।
