ଏମ୍ଭି ୭୮,୧୧ା୬(ଡି.ଏନ୍.ଏ.)-ମାଲକାନଗିରି ଜିଲା ସୀମାନ୍ତ ପଡ଼ିଆ ଓ କାଲିମେଳା ବ୍ଲକର ବିଭିନ୍ନ ସ୍ଥାନରେ କଇଁଛ ଚୋରା ଚାଲାଣ କରାଯାଉଥିବା ଅଭିଯୋଗ ହୋଇ ଆସୁଥିଲା। ଏଥିରେ ଆନ୍ତଃରାଜ୍ୟ ର଼୍ୟାକେଟ ସମ୍ପୃକ୍ତ ଥିବା ଜଣାପଡିବା ପରେ ବନ ବିଭାଗ ନଜର ରଖିଥିଲା। ଗୁରୁବାର ଚଢାଉ କରି ଏଥିରେ ସମ୍ପୃକ୍ତ ୪ଜଣଙ୍କୁ ଗିରଫକରି କୋର୍ଟ ଚାଲାଣ କରାଯାଇଛି। ଗିରଫ ବ୍ୟକ୍ତିମାନେ ହେଲେ ଏମ୍ଭି-୯୬ ଗ୍ରାମର ବିଶ ସିଲ୍, ବଳାଇ ସରକାର,ଏମ୍ପିଭି-୬୫ ଗ୍ରାମର ସାଗର ମଲ୍ଲିକ ଏବଂ ବିପୁଳ ମିର୍ଦ୍ଧା। ଏନେଇ ୧୮,୧୯/୨୦ରେ ଦୁଇଟି ମାମଲା ରୁଜୁ ହୋଇଛି। ଖବରରୁ ଜଣାପଡିଛି କଇଁଛ ଚୋରାଚାଲାଣ ନେଇ ଅଭିଯୋଗ ହେବା ପରେ ଗତ କିଛିଦିନ ଧରି ବନ ବିଭାଗ କର୍ମଚାରୀମାନେ ଗୁପ୍ତ ସୂଚନା ସଂଗ୍ରହ କରି ଏକାଧିକ ସ୍ଥାନରେ ଚଢାଉ କରୁଥିଲେ। ବୁଧବାର ବିଳମ୍ବିତ ରାତିରେ ଏକ ସୂତ୍ରରୁ ଖବର ପାଇ ଏମ୍ଭି-୭୯ ରେଞ୍ଜର ବଳରାମ ନାୟକଙ୍କ ନେତୃତ୍ୱରେ ଫରେଷ୍ଟର ଶିବଜିତ ମଣ୍ଡଳ, ବିଦ୍ୟୁତ୍ ବିଶ୍ବାସ, ସୁମିତ୍ରା ବିଶ୍ବାସ ଓ ମମତା ବିଶୋୟୀ ଏମ୍ପିଭି-୪୨ ଏବଂ ଏମ୍ପିଭି-୮୩ ଗ୍ରାମ ଛକଠାରେ ଜଗିଥିଲେ। ଗୁରୁବାର ସକାଳ ୯ଟାରେ ୨ଟି ମୋଟରସାଇକେଲରେ କଇଁଛ ନେଇ ଉପରୋକ୍ତ ୪ ଜଣ ବ୍ୟକ୍ତି ଯାଉଥିବା ବେଳେ ବନ ବିଭାଗ ପକ୍ଷରୁ ସେମାନଙ୍କୁ ଧରାଯାଇଥିଲା। ପରେ ସେମାନଙ୍କୁ ବନ ବିଭାଗ କାର୍ଯ୍ୟାଳୟକୁ ଆଣି ପଚରାଉଚରା କରାଯାଇଥିଲା। ୨ଟି ମୋଟରସାଇକଲରୁ ୪୦ କେଜି କଇଁଛ ଜବତ କରାଯାଇଛି। ଏହି କଇଁଛ ସେମାନେ ଆନ୍ଧ୍ରର କାକିନାଡା ଅଞ୍ଚଳରୁ ଆଣି ସ୍ଥାନୀୟ ଅଞ୍ଚଳରେ ବିକ୍ରି କରୁଥିବା ଜଣାପଡିଛି।
