ନ୍ୟୁୟର୍କ, ୨୬।୬: ୨୦୧୫ରେ ସିରିଆର ଶରଣାର୍ଥୀ ଶିଶୁ ଆଲନ କୁର୍ଦ୍ଦି ସମୁଦ୍ରକୂଳରେ ପଡିଥିବାର ଦୃଶ୍ୟ ସାରା ଦୁନିଆକୁ ସ୍ତବ୍ଧ କରିଦେଇଥିଲା। ସେମିତି ଏକ ହୃଦୟବିଦାରକ ଚିତ୍ର ପୁଣିଥରେ ଭାଇରାଲ ହୋଇଛି। ଆମେରିକା ପାଖରେ ଥିବା ଏକ ଦେଶ ଇଆଇ ସାଲଭେଡୋର ନିବାସୀ ୨୫ ବର୍ଷୀୟ ଆଲବର୍ଟ ମାର୍ଟିନେଜ୍ ରାମିରେଜ ଏବଂ ତାଙ୍କ ୨ବର୍ଷର ଝିଅ ଫ୍ଲୋରିଆଙ୍କୁ ସମୁଦ୍ରକୂଳରେ ମୃତାବସ୍ଥାରେ ପଡିଥିବାର ଦେଖି ପୁଣି ଥରେ ମନେ ପକାଇଦେଇଛି ଅଲନଙ୍କ କଥା। ବାପ-ଝିଅ ଆମେରିକାରେ ମୁଣ୍ଡ ଗୁଞ୍ଜିବା ପାଇଁ ଆସୁଥିବାବେଳେ ମେକ୍ସିକୋର ରିୟୋ ଗ୍ରାଣ୍ଡ ନଦୀରେ ବୁଡି ଯାଇଥିଲେ। ଫଟୋରେ କୁନି ଶିଶୁଟିର ହାତ ପିତାଙ୍କ ଶାର୍ଟ ଭିତରେ ପଶିଯାଇଛି। ସୂଚନାଯୋଗ୍ୟ, ଆମେରିକା-ମେକ୍ସିକୋ ବର୍ଡରରେ ହଜାର ହଜାର ଶରଣାର୍ଥୀ ରହିବା ପାଇଁ ଯାଗା ଖୋଜୁଛନ୍ତି। ଗତବର୍ଷ ଏଠାରେ ୨୮୩ଜଣ ଶରଣାର୍ଥୀଙ୍କ ମୃତ୍ୟୁ ହୋଇଥିଲା। ଶରଣାର୍ଥୀମାନେ ଏବେ କେଉଁ ଦେଶକୁ ନିଜର ଦେଶଭାବେ ପ୍ରମାଣ ଦେଇପାରୁନଥିବାରୁ କୋଣସି ଦେଶ ସେମାନଙ୍କୁ ନିଜର ବୋଲି କହିବାକୁ ଚାହୁଁନାହାଁନ୍ତି। ଏଭଳି ସମୟରେ ଶରଣାର୍ଥୀମାନେ ଖୋଲା ଆକାଶ ତଳେ ଜୀବନ ବିତାଇବା ବ୍ୟତୀତ ଅନ୍ୟ କିଛି ଉପାୟ ପାଉନାହାଁନ୍ତି ।
