ନୟାଗଡ଼ ଅଫିସ,୩।୧୧-ନବନିର୍ମାଣ କୃଷକ ସଙ୍ଗଠନ ପକ୍ଷରୁ ନୂଆଗାଁ ବ୍ଲକରେ ବ୍ଳକସ୍ତରୀୟ ବୈଠକ ମହିପୁର ରାମଚଣ୍ଡୀଙ୍କ ପୀଠଠାରେ ଅନୁଷ୍ଠିତ ହୋଇଯାଇଛି। ଆସନ୍ତା ୬ ତାରିଖରେ ଭୁବନେଶ୍ୱର ବରମୁଣ୍ଡା ପଡ଼ିଆରେ ହେବାକୁ ଥିବା ଦ୍ୱିତୀୟ ରାଷ୍ଟ୍ରୀୟ ସମ୍ମିଳନୀ ସଫଳ କରିବା ପାଇଁ ଏହି ବୈଠକ ଅନୁଷ୍ଠିତ ହୋଇଥିଲା। ବ୍ଲକ ସଂଯୋଜକ ଧୀରେନ ଦାଶଙ୍କ ସଭାପତିତ୍ୱରେ ହୋଇଥିବା ଏହି ବୈଠକରେ ନୂଆଗାଁ ବ୍ଲକର ସମସ୍ତ ପଞ୍ଚାୟତ ପ୍ରତିନିଧିମାନେ ଯୋଗ ଦେଇଥିଲେ। ଜିଲା ସହ ସଂଯୋଜିକା ମମତା ନାଥ ତାଙ୍କ ବକ୍ତବ୍ୟରେ ସରକାର ସବୁବେଳେ ଚାଷୀଙ୍କୁ ଅଣଦେଖା କରୁଥିବା ପ୍ରକାଶ କରିଥିଲେ। ପ୍ରତ୍ୟେକ କମ୍ପାନୀ ତା’ର ଜିନିଷର ମୂଲ୍ୟ ନିର୍ଦ୍ଧାରଣ କରୁଥିବା ବେଳେ ଚାଷୀ ତା’ର ଉପତ୍ାଦିତ ଦ୍ରବ୍ୟର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସପି)ରେ କାହିଁକି ବିକ୍ରି କରିପାରୁନାହିଁ, ଏହା ଚାଷୀମାନଙ୍କ ପ୍ରତି ଉଭୟ କେନ୍ଦ୍ର ଓ ରାଜ୍ୟ ସରକାର ଅନ୍ୟାୟ କରୁଛନ୍ତି ବୋଲି କହିଥିଲେ। ସଂଯୋଜକ ଦାଶ ତାଙ୍କ ବକ୍ତବ୍ୟରେ ପ୍ରତ୍ୟେକ ରାଜନୈତିକ ଦଳ ଚାଷୀଙ୍କୁ ଲୁଟି ଚାଲିଛନ୍ତି ଆଉ ଭଣ୍ଡାଉଛନ୍ତି ବୋଲି କହିଥିଲେ। ରାଜ୍ୟରେ ଟଙ୍କାର ଅଭାବ ନ ଥିବା ବେଳେ ରାଜନେତାମାନେ ଚାଷୀଙ୍କ ଉନ୍ନତି ପାଇଁ ଇଚ୍ଛାଶକ୍ତିର ଅଭାବ ପରିଲକ୍ଷିତ ହେଉଥିବା ପ୍ରକାଶ କରିଥିଲେ। ଚାଷୀମାନେ ଦେଶକୁ ଦାନା ଯୋଗାଉଥିବା ବେଳେ ସରକାର ସେମାନଙ୍କୁ ଲୁଟି ଚାଲୁଛନ୍ତି। ତେଣୁ ଏହାର ପ୍ରତିବାଦରେ ୬ ତାରିଖରେ ହେବାକୁ ଥବା ସମାବେଶରେ ପ୍ରତ୍ୟେକ ଗ୍ରାମର ଶହ ଶହ ଚାଷୀ ଯୋଗ ଦେବା ପାଇଁ ସେ ଆହ୍ବାନ ଦେଇଥିଲେ। ଜିଲା ସହ ସଂଯୋଜକ ରଞ୍ଜିତ ଦଳବେହେରା ନିଜ ବକ୍ତବ୍ୟରେ ଚାଷୀମାନଙ୍କ ହକ୍ ପାଇଁ ଆନ୍ନା ହଜାରେ ଓ ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର , ରାଜ୍ୟ ସଂଯୋଜକ ଶେଷଦେବ ନନ୍ଦ ଯୋଗ ଦେଇଥିବାରୁ ହଜାର ହଜାର ଚାଷୀ ଯୋଗ ଦେଇ ସେମାନଙ୍କ ହକ୍ ପୂରଣ କରିବା ପାଇଁ ଆନ୍ଦୋଳନ କରିବା ଦରକାର ବୋଲି ପ୍ରକାଶ କରିଥିଲେ। ଅନ୍ୟମାନଙ୍କ ମଧ୍ୟରେ ଏହି ବୈଠକରେ ଆର୍ତ୍ତତ୍ରାଣ ମହାପାତ୍ର, ଭଗବାନ ସେନାପତି, ରବୀନ୍ଦ୍ର କୁମାର ବରାଡ଼, ପ୍ରଦୀପ କୁମାର ନାୟକ, ଅକ୍ରୂର ସାସମଲ, ଗଙ୍ଗାଧର ମୁଦୁଲି, ଶୂନ୍ୟବାସୀ ସାହୁ ପ୍ରମୁଖ ଯୋଗ ଦେଇଥିଲେ।
