ଦାରିଙ୍ଗବାଡ଼ି,୧୯।୧୦(ଡି.ଏନ.ଏ)-ଦାରିଙ୍ଗବାଡ଼ି ବ୍ଲକ ତିଲୋରୀ ପଞ୍ଚାୟତରେ ଶୁକ୍ରବାର ସଂନ୍ଧ୍ୟା ୭ଟାରେ ବିଏସ୍ଏନ୍ଏଲ୍ ମୋବାଇଲ ସେବାର ଶୁଭାରମ୍ଭ ହୋଇଯାଇଛି। ଏହି ସେବା ତିଲୋରୀର ପ୍ରାୟ ୫ହଜାରରୁ ଉର୍ଦ୍ଧ୍ୱ ଲୋକ ପାଇବେ। ଅଞ୍ଚଳବାସୀ ମୋବାଇଲ ସେବା ପାଇଁ ଦୀର୍ଘଦିନ ହେଲା ଦାବି କରିଆସୁଥିଲେ ମଧ୍ୟ ହୋଇପାରୁନଥିଲା। ପଞ୍ଚାୟତ ପକ୍ଷରୁ ସରପଞ୍ଚ ବିଷ୍ଣୁଚରଣ ପ୍ରଧାନ ଜିଲା ଅଧିକାରୀଙ୍କ ସହ ଆଲୋଚନା କରି ନିଜସ୍ବ ଉଦ୍ୟମରେ ଏକ ଟାୱାର ନିର୍ମାଣ କରିଥିଲେ। ସେଠାରେ ବିଭାଗ ମୋବାଇଲ ସେବା ପାଇଁ ଆବଶ୍ୟକ ଯନ୍ତ୍ରପାତି ଲଗାଇ କାର୍ଯ୍ୟକ୍ଷମ କରି ଲୋକଙ୍କୁ ସେବା ଯୋଗାଇ ଦେଇଛି। ପଞ୍ଚାୟତ ଅଧୀନରେ ରହିଥିବା ନଳକୁଅ ମରାମତିରୁ ବାହାରିଥିବା ଖରାପ ପାଣି ପାଇପ୍ ଗୁଡ଼ିକୁ ନେଇ ଏହି ଟାୱାର ତିଆରି କରାଯାଇଛି। ଏହା ତିଆରି ପାଇଁ ମାତ୍ର ୨୫ ହଜାରଟଙ୍କା ଖର୍ଚ୍ଚ ହୋଇଥିବା ସରପଞ୍ଚ ବିଷ୍ଣୁଚରଣ ପ୍ରଧାନ କହିଛନ୍ତି। ଏନେଇ ସେ ବିଏସଏନଲର ଜିଲା ଅଧିକାରୀ ଏବଂ ବାଲିଗୁଡ଼ା ଉପଖଣ୍ଡ କାର୍ଯ୍ୟାଳୟର ଅଧିକାରୀ, କନ୍ଧମାଳ ଜିଲାପାଳ ଡ.ବୃନ୍ଦା ଡି ଏବଂ ଦାରିଙ୍ଗବାଡ଼ି ବିଡିଓ ଭକ୍ତବନ୍ଧୁ ଜନାର୍ଦ୍ଦନ ଦଳେଇଙ୍କୁ ସାଧୁବାଦ ଜଣାଇଛନ୍ତି।
