ପାରାଦୀପ, ୨୮।୩ (ସ୍ବ.ପ୍ର.)-ପାରାଦୀପ ଲକ୍ ଥାନା ଅଧୀନ ନିମିତି ଗ୍ରାମରେ ଶୁକ୍ରବାର ରାତିରେ ଜଣେ ନବବଧୂ ମୁନୁଙ୍କୁ ଶାଶୁଘର ଲୋକେ ହତ୍ୟା କରିଥିବା ଅଭିଯୋଗ ହୋଇଛି। ଏ ନେଇ ମୁନୁଙ୍କ ବାପା କେନ୍ଦୁଝର ଜିଲା ନନ୍ଦିପଡ଼ା ଥାନା ଅଧୀନ ସରଳା ଗ୍ରାମର ପବିତ୍ର କବି ଥାନାରେ ଅଭିଯୋଗ କରିଛନ୍ତି। ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରିବା ସହ ଶନିବାର ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏଥିସହ ମୁନୁଙ୍କ ସ୍ବାମୀ କାଳନ୍ଦୀ ପଣ୍ଡାଙ୍କ ପୁଅ ପପୁନାଙ୍କୁ ପୋଲିସ ଅଟକ ରଖି ପଚରାଉଚୁରା ଚଳାଇଛି ବୋଲି ଥାନା ସୂତ୍ରରୁ ପ୍ରକାଶ।
ଅଭିଯୋଗ ମୁତାବକ, ୨୦୧୯ ମେ’ରେ ମୁନୁ ନିମିତି ଗ୍ରାମର ପପୁନାଙ୍କୁ ବିବାହ କରିଥିଲେ। ବାହାଘର ପରେ ଶାଶୁଘର ଲୋକେ ଅଧିକ ଯୌତୁକ ଦାବିକରି ଅନେକ ସମୟରେ ମୁନୁଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଉଥିଲେ। ତେବେ ଶାଶୁଘର ଲୋକେ ମିଶି ମୁନୁଙ୍କୁ ହତ୍ୟା କରିଛନ୍ତି ବୋଲି ଅଭିଯୋଗ ପତ୍ରରେ ଦର୍ଶାଯାଇଛି। ଅନ୍ୟପଟେ ଶୁକ୍ରବାର ରାତିରେ ମୁନୁ ଓ ପପୁନାଙ୍କ ମଧ୍ୟରେ କୌଣସି କାରଣରୁ ଝଗଡ଼ା ହୋଇଥିଲା। ଏହାପରେ ମୁନୁ ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି ବୋଲି ସାଧାରଣରେ ଆଲୋଚନା ହେଉଛି।
