ନୂଆଦିଲ୍ଲୀ,୧୨।୧୨: ଦେଶର ବହୁ ଚର୍ଚ୍ଚିତ ନିର୍ଭୟା ଗଣବଳାତ୍କାର ଓ ହତ୍ୟା ମାମଲାର ଦୋଷୀଙ୍କୁ ନେଇ ଏବେ ଚର୍ଚ୍ଚା ଯୋର ଧରିଛି। କାରଣ ଖୁବ୍ଶୀଘ୍ର ଏମାନଙ୍କୁ ଫାଶୀ ମିଳିପାରେ ବୋଲି କୁହାଯାଉଛି। ତିହାର ଜେଲ ପ୍ରଶାସନ ଜେଲ ମୁଖ୍ୟାଳୟକୁ ପତ୍ର ଲେଖି ଜହ୍ଲାଦ ମାଗିଥିବା ସୂଚନା ମିଳିଛି। ଉକ୍ତ ପତ୍ରରେ ଯଦିଓ କାହାକୁ ଫାଶୀ ଦିଆଯିବ ତାହା ଉଲ୍ଲେଖ କରାଯାଇ ନାହିଁ ତେବେ କେତେ ଗୁଡିଏ ମାମଲାର ଦୋଷୀଙ୍କୁ ଫାଶୀ ଦେବା ଲାଗି ଜହ୍ଲାଦର ଆବଶ୍ୟକତା ରହିଛି ବୋଲି ଲେଖାଯାଇଛି। ଏଥିରୁ ଅନୁମାନ କରାଯାଇଛି କି ନିର୍ଭୟା ମାମଲାର ଦୋଷୀଙ୍କୁ ଫାଶୀ ଦେବାଲାଗି ଉତ୍ତର ପ୍ରଦେଶରୁ ଜହ୍ଲାଦ ଆସିପାରନ୍ତି। କାରଣ ଏମାନଙ୍କୁ ଫାଶୀ ଦଣ୍ଡାଦେଶ ରହିଛି। କେବଳ ନିର୍ଭୟା ମାମଲା ନୁହେଁ ଆଉ କିଛି ମାମଲାର ଦୋଷୀଙ୍କର ସବୁ ଆବେନଦ ଖାରଜ ହୋଇଯିବା ପରେ ଏମାନେ ଫାଶୀ ପାଇବେ ବୋଲି କୁହାଯାଉଛି। ତିହାର ଜେଲ ପ୍ରଶାସନ ଜହ୍ଲାଦଙ୍କର ସମସ୍ତ ଖର୍ଚ୍ଚ ବହନ କରିବେ ବୋଲି ଉଲ୍ଲେଖ କରିଛନ୍ତି। ଉତ୍ତର ପ୍ରଦେଶ କାରାଗାରର ଡିଜି ଆନନ୍ଦ କୁମାରଙ୍କ ସୂଚନା ଅନୁଯାୟୀ, ଲକ୍ଷ୍ନୌ ଓ ମିରଠରେ ୨ ଜଣ ଜହ୍ଲାଦ ରହିଛନ୍ତି। ତେବେ ତିହାର ଜେଲ ପ୍ରଶାସନ ପକ୍ଷରୁ ଯେବେ ଫାଶୀର ତାରିଖ ଧାର୍ଯ୍ୟ କରାଯିବ ତେବେ ଜହ୍ଲାଦ ଯୋଗାଇ ଦିଆଯିବ ବୋଲି ଆନନ୍ଦ କୁମାର କହିଛନ୍ତି।
