ଆମେଠି,୨୭।୨: ଦେଶରେ ହିନ୍ଦୁ-ମୁସଲମାନ୍ ନେଇ ହିଂସା ଘଟୁଥିବାବେଳେ ଉତ୍ତରପ୍ରଦେଶ ଆମେଠିର ପିଢ଼ି ଗାଁରେ ଭାଇଚାରାର ନିଆରା ଉଦାହରଣ ସୃଷ୍ଟି କରିଛନ୍ତି ଦୁଇ ବାଲ୍ୟ ବନ୍ଧୁ କୃଷ୍ଣଦତ୍ତ ତିଓ୍ବାରି ଏବଂ ବକରିଦି। ୮୨ ବର୍ଷ ବୟସ୍କ ବକରିଦି ସ୍ଥାନୀୟ ମଦ୍ରାସାରେ ଶିକ୍ଷାଦାନ କରନ୍ତି। ସେହିପରି କୃଷ୍ଣଦତ୍ତ ଗାଁରେ ଥିବା ତପେଶ୍ୱର ଶିବ ମନ୍ଦିରରେ ପୂଜା କରନ୍ତି। ଦୁଇ ବନ୍ଧୁଙ୍କ ମଧ୍ୟରେ ଏଭଳି ବନ୍ଧୁତା ୭୫ ବର୍ଷ ଧରି ରହିଆସିଛି। ସେମାନଙ୍କ ଉଦ୍ୟମରେ ଗାଁରେ ତପେଶ୍ୱର ମନ୍ଦିର ନିର୍ମାଣ କରାଯାଇଥିଲା। ଜାଗର, ଶ୍ରାବଣ ମାସ ସୋମବାର ଏବଂ ଅନ୍ୟ ପର୍ବପର୍ବାଣୀରେ ବକରିଦି ମନ୍ଦିରକୁ ନ ଆସିଲେ କୃଷ୍ଣଦତ୍ତ ପୂଜା ନ କରି ଅପେକ୍ଷା କରିଥାନ୍ତି। ବକରିଦି ଆସିଲେ ପୂଜା ହୁଏ। ଗାଁରେ ଉଭୟ ସମ୍ପ୍ରଦାୟ ହୋଲି, ଦିଓ୍ବାଲି, ଇଦ୍ ମିଳିମିଶି ପାଳନ କରନ୍ତି। ସେମାନେ କୁହନ୍ତି ନୁହେଁ ଆମେ ହିନ୍ଦୁ ଅବା ମୁସଲମାନ୍। ଆମେ ହିନ୍ଦୁସ୍ତାନୀ ଆମ ଦେଶ ହିନ୍ଦୁସ୍ତାନ।
