ଚେନ୍ନାଇ, ୧୭।୫: ବର୍ତ୍ତମାନ ପ୍ରଚଳିତ ଏକଦିବସୀୟ କ୍ରିକେଟ ନିୟମକୁ ନେଇ ଅନେକ ସମୟରେ ଚର୍ଚ୍ଚା ହେଉଛି। ସାମ୍ପ୍ରତିକ ନିୟମ ବୋଲରଙ୍କ ଅପେକ୍ଷା ବ୍ୟାଟ୍ସମ୍ୟାନଙ୍କୁ ଅଧିକ ସୁହାଉଛି ବୋଲି ଅନୁଭବ କରୁଛନ୍ତି ପୂର୍ବତନ ଭାରତୀୟ କ୍ରିକେଟର ତଥା ଚୟନ କମିଟି ମୁଖ୍ୟ କ୍ରିଷ୍ଣାମାଚାରୀ ଶ୍ରୀକାନ୍ତ। ସଚିନ ତେନ୍ଦୁଲକର ଓ ସୌରଭ ଗାଙ୍ଗୁଲିଙ୍କ ସମୟରୁ ଦିନିକିଆ କ୍ରିକେଟ ବ୍ୟାଟ୍ସମ୍ୟାନ ସର୍ବସ୍ବ ହୋଇଯାଇଛି। ଏଥିରେ ବୋଲରଙ୍କ ପାଇଁ ବିଶେଷ ସୁଯୋଗ ନାହିଁ। ”ତେନ୍ଦୁଲକର ଦିନିକିଆରେ ଦୁଇଟି ନୂଆ ବଲ ବ୍ୟବହାରକୁ ପସନ୍ଦ କରିଥିଲେ, ଅର୍ଥାତ୍ ଗେମ୍ରୁ ରିଭର୍ସ ସୁଇଂ ଚାଲି ଯାଇଥିଲା । ସେହିପରି ଗାଙ୍ଗୁଲି ମଧ୍ୟ ୨ ନୂଆ ବଲ୍ ସପକ୍ଷରେ ଥିଲେ, ଅର୍ଥାତ୍ ପ୍ରତି ଓଭରରେ ବାଉଣ୍ଡାରି ସମ୍ଭବ। ବ୍ୟାଟ୍ ଓ ବଲ୍ର ଲଢ଼େଇ ହେଲେ ଯାଇ ମ୍ୟାଚରେ ରୋମାଞ୍ଚ ଆସିଥାଏ। ଆମ ସମୟରେ ବାଉଣ୍ଡାରି ପାଇଁ ୮୦-୯୦ ମିଟର ଦୂରତ୍ୱ ରଖା ଯାଉଥିଲା। ମାତ୍ର ବର୍ତ୍ତମାନ ତାହା ୭୦-୭୫ ମିଟର ମଧ୍ୟରେ ସୀମିତ ରହୁଛି । ଫଳରେ ବ୍ୟାଟ୍ସମ୍ୟାନଙ୍କ କାର୍ଯ୍ୟ ସହଜ ହୋଇଯାଉଛି“ ବୋଲି ଶ୍ରୀକାନ୍ତ ପ୍ରକାଶ କରିଛନ୍ତି। ପ୍ରକାଶ ଯୋଗ୍ୟ ଯେ, ବର୍ତ୍ତମାନ ଏକଦିବସୀୟ କ୍ରିକେଟରେ ପ୍ରତି ଇନିଂସ ଆରମ୍ଭରେ ନୂଆ ବଲ୍ ବ୍ୟବହାର ହେଉଛି। ପଡ଼ିଆ କଟକଣା ରହିବା ସହ ପ୍ରତି ଇନିଂସରେ ୩ଟି ଲେଖାଏ ପାୱାରପ୍ଲେ ସ୍ଥାନ ପାଉଛି। ୧-୧୦ ଓଭର ପାୱାରପ୍ଲେରେ ମାତ୍ର ୨ ଫିଲ୍ଡର ୩୦ ଗଜ ବାହାରେ ରହି ପାରୁଛନ୍ତି। ଦ୍ୱିତୀୟ ପାୱାରପ୍ଲେରେ ୪ ଜଣ ଏବଂ ତୃତୀୟ ପାୱାରପ୍ଲେରେ ୫ ଫିଲ୍ଡର ବାହାରକୁ ଯାଇ ପାରୁଛନ୍ତି। ତାଙ୍କ ସମୟରେ ଏପରି ନିୟମ ଥିଲେ ସେ ନିଶ୍ଚିତ ଅଧିକ ରନ ସଂଗ୍ରହ କରି ପାରିଥାନ୍ତେ ବୋଲି ଶ୍ରୀକାନ୍ତ କହିଛନ୍ତି ।
